3 варијации на Мохито - кралот на летните коктели

Веројатно сите ги знаеме состојките за подготовка на најомилениот освежувачки летен коктел. Мохитото, коктел со потекло од Куба, е мешавина од бел рум, газирана вода, многу ливчиња свежо нане, лимета, малку шеќер и мраз.

Оние кои преферираат посладок вкус на Мохитото може да употребат Спрајт, наместо газирана вода.

Што е најдобро кај Мохитото? Што состојките се лесно достапни, а се прави брзо и лесно. Не мора да сте некој коктел мајстор за да си подготвите совршено Мохито освежување.

Ви предлагаме 3 подеднакво вкусни варијации на основната верзија Мохито за совршено летно освежување, апсолутни победници на секоја забава или лежерно опуштање:

Темно мохито

Наместо бел рум, употребете 60 мл. темен рум.

Потребни ви се уште:

• 8 ливчиња свежо нане,
• 2 лажички кафеав шеќер,
• сок од половина лимета и
• газирана вода.

Ливчињата нане, сокот од лимета и кафеавиот шеќер нежно се гмечат со помош на толчник на дното од поголема чаша. Се додава кршен мраз, рум и газирана вода или Спрајт.

Декорирајте со ливчиња нане и/или парченца зелена лимета.

Мохито јагода

Време е да се искористи сезоната на јагодите. Поради слаткоста на вкусното овошје и ликерот, во оваа варијација Мохито пожелно е да ги изоставите кафеавиот шеќер и Спрајтот.

Потребни ви се:

• 6 свежи јагоди,
• 15 ml ликер од јагода,
• 60 ml бел рум,
• нане, сок од лимета, мраз.

На дното од изладена чаша со поголемо дно се гмечат свежите јагоди со нането, сокот од лимета и ликерот од јагоди.

Се додава мраз, бел рум и газирана вода. Декорирајте со ливчиња нане и парченца јаготки.

Мохито кокос

Кога ќе го вкусите неизбежно ќе помислите на плажа, море и сонце. Идеално избалансиран вкус на кокос и основната верзија Мохито, а ова е сé што ви треба за подготовка:

• 6 ливчиња свежо нане,
• 3 парчиња лимета,
• 1 лажичка кафеав шеќер,
• 40 ml бел рум,
• 20 ml Малибу кокосов рум (или ликер од кокос во количина од 15 ml.),
• мраз, газирана вода.

Измешајте ги ливчињата нане со лиметата и кафеавиот шеќер на дното од чашата со гмечење. Додадете бел рум, кокосов рум или ликер од кокос, многу кршен мраз и добро измешајте. На крајот додадете газирана вода и декорирајте по желба.

(О)Милена | Црнобело