Разладете се: Освежителни пијалаци кои се прават за пет минути

Температурите од ден на ден сé повеќе се зголемуваат. Освен што се криеме во ладовина или простории со клима, спас бараме и во ладни и освежителни пијалаци.

Следниве предлози ќе ве разладат, а можете да ги подготвите многу брзо и едноставно и тоа дома или на работа.

Ладно фрапе

Одличен избор што инстантно ќе ве расони и ќе ве освежи.  Само со вода, со шеќер и млеко или без, и многу мраз – фрапето е готово за неколку минути.

Вода со вкус

Ако ви здодеа цело време да пиете обична вода со мраз, додајте ѝ некој вкус. Исечкајте некое сезонско овошје или додајте малку рендан ѓумбир, цимет или ливчиња свежо нане. Овие состојки ќе ѝ дадат убав вкус на водата, а помагаат и за детоксикација на организмот.

Лимонада

Старата добра лимонада отсекогаш била поим за летно освежување. Варијации има многу – лимонада со лаванда, со вкус на роза или пак со ливчиња нане. Наместо цеден лимон, добра опција е и цеден портокал.

Леден чај

Не мислиме на ледениот чај од продавница бидејќи содржи многу шеќер во својот состав. Сварете си чај (наша препорака е зелен) и оставете го во фрижидер цела ноќ . Следниот ден ќе имате совршен здрав летен пијалак.

М. В. | Црнобело