Бракот е крајната цел, убавите луѓе се слаби: 4 причини зошто бајките не се добри за вашите деца

Што имаат Снежана, Пепелашка и Заспаната убавица заедничко? Куп стереотипи!

Постојат приказни за пред спиење кои им се раскажуваат години наназад на децата. Тие се инспирација за филмски адаптации, кои потоа прават лудило на бокс офисот.

Колку и да ги обожаваме приказните за „Снежана“, „Пепелашка“, „Убавицата и ѕверот“ сепак не можеме, а да не забележиме дека во нив има чудни идеологии, застарени гледања на работите и поделби на улогите.

Авторот на книгата „Fairytales and Feminism“ и универзитетски професор, Доналд Хаас, ги поттикнува родителите кога ќе ги пренесуваат овие приказни на своите деца, да го прават тоа со доза на скептицизам поради архаизмите во нив.

„Родителите треба да ги раскажуваат или читаат класичните бајки на децата со намерно посочување и отворање на прашањата околу стереотипите во нив“, вели тој.

Кои се стереотипите на кои треба да внимаваат родителите?

Жените се пасивни суштества кои треба да бидат спасени од мажите

Што имаат Снежана, Пепелашка и Заспаната убавица заедничко?

Покрај порцеланската кожа и неверојатно сјајната коса, секој од главните женски ликови во бајките чека да биде спасен од својата животна мизерија или вечен сон од шармантниот принц.

Овој лик често е концентриран на потрагата по „вистинската љубов“, па ова става доза на стрес врз рамениците на жените во реалниот свет, затоа што се наведени да мислат дека треба да ја преземат оваа улога во животот.

Бракот е крајната цел

Во време кога бракот се одложува за што подоцна, а некои луѓе избираат никогаш и да не стапат во брак, навистина е чудна идејата што ја промовираат бајките „ајде да се земеме и да живееме среќно до крајот на животот“.

За жал, ова е секогаш во фокусот на бајките и нивната кулминација е огромната свадбена прослава на крајот. Вечниот романтичен сојуз го имаме на пиедесталот, дури и во модерните анимирани филмови од типот на Шрек.

Ова не само што го посочува бракот како крајна цел за двата пола, туку фрла комплетна сенка на потребата од професионална, финансиска и социјална реализација на личноста, па така изгледа дека личност што не е во брак, без разлика на останатите постигнувања, е неуспешна личност за која во општеството нема место.

„Љубовта се гледа како концепт кој се случува кога ќе пронајдеш некој за да се омажиш/ожениш, а не како еволуирачки филозофски концепт“, вели Доналд.

Недостаток на расна/физичка/сексуална разновидност

Познато е дека сите Дизни принцези се убави и слаби и најчесто бели, со исклучок на Мулан, Покахонтас и принцезата Џасмин.

Подеднакво проблематични се поставените нереални стандарди за телото. Погледнете ги само Бела и Ариел.

На дете, кое се соочува со овие бајки за првпат, толку рестриктивните естетски стандарди може да му влијаат навистина негативно и идејата за убавина и среќа да му ја направат синоним со тоа да се биде слаб.

Ретко кога се вклучуваат плус сајз ликови во бајките, а кога ги има тие се во споредни улоги.

Женските ликови секогаш се жртвуваат за домот

Уште една заедничка карактеристика на Снежана, Пепелашка и Заспаната убавица е поврзаноста за домот. Тие постојано се жртви во име на саканите.

Бела мора да го спаси својот сиромашен татко од ѕверот, Пепелашка е присилена на триење на куќниот под, а Снежана мора да се грижи за 7-те џуџиња.

Плус, едновремено се справуваат со злобни маќеи, сестри, вештерки и никаде немаме концепт на сестринство и концепт каде семејството е поддршка за да успееме.

С. С. | Црнобело