Дали сте родени со патувачкиот ген?

Дали некои луѓе имаат генетски предиспозиции повеќе да патуваат? Научниците велат можеби.

Одредени личности имаат силна потреба да го наполнат куферот со неопходните работи, да го грабнат пасошот и да започнат нова авантура, не грижејќи се премногу за логистиката на патувањето или одреден план кој мора прецизно да се следи.

Броењето печатчиња во пасошот е нешто слично како колекција мали трофеи. Овие луѓе едноставно не се грижат дали 20 дена по ред не спиеле во сопствениот кревет.

Внатрешниот импулс и потреба да се патува е поголема од сè друго.

Дали ваквата потреба е придвижена од активирањето на одредени хормони, односно од некој вид хемиска реакција која се случува во организмот?

До одреден степен, истражувањата поткрепија една теорија која е особено интересна. Научниците упорно се обидуваат да ја поврзат оваа вродена желба за патување со варијација на генот познат како DRD4-7R, за којшто се смета дека го има околу 20% од популацијата.

DRD4 е допамински рецептор кој помага во контрола на нивоата на допамин во нашите мозоци. Допаминот е невротрансмитер којшто може да се активира од вкусување едноставни нешта, како чоколадо или екстази па сè до примање порака од некој близок  или сакан, и е претходник на некои други супстанции, вклучувајќи го и адреналинот.

Истражувачите тврдат дека варијацијата на DRD4 генот позната како DRD4-7R има помала чувствителност кон допамин. Се смета дека околу 20 проценти од популацијата ја носат во себе оваа варијација на генот и согласно теоријата, значи дека веројатно им се потребни повеќе искуства и авантури кои ослободуваат повеќе допамин.

Се смета дека 7R, варијација на генот DRD4 кој делува на нивото на допамин во мозокот е исто така поврзан со чувствата на немир и љубопитност, па оттука следува огромната желба за талкање и патување кај некои луѓе која е драстично поизразена отколку кај други.

Дали вие го имате патувачкиот ген во себе?

(O)Милена | Црнобело