Прљаво казалиште - „Партиите не сакаат, ама не ја менуваме музиката за политика!“

Додека трае предизборниот молк, Скопје ќе танцува на хитовите на популарниот хрватски бенд „Прљаво казалиште“. Легендарните музичари на 26 април ќе настапат во арената „Метрополис“.

На оваа свирка ќе го промовираат последниот албум „Можда догодине“. Но нема да ги заобиколат песните што ја одбележаа нивната кариера како „Марина“, „Ми плешемо“, „Ту ноќ кад си се удавала“.

- Секоја година барем еднаш гостуваме во Македонија. Освен публиката во Скопје, нe` имаат слушнато и луѓето во Охрид и во Струмица. Сите тие концерти беа одлични и супер се забавувавме, така што нема причина да биде поинаку и овој пат во главниот град - објаснуваат музичарите.

Немавме потреба да следиме трендови.

„Прљаво казалиште“ ќе свири на ден пред изборите. Бендот отсекогаш бил политички ангажиран, а беше дел и од предизборната кампања на партијата Хрватска демократска заедница.

- Ние никогаш не сме биле миленици само на една политичка опција и сме биле дел од предизборните кампањи на повеќе партии. „Прљаво казалиште“ од основањето е ангажиран бенд кој зборува за социјалната реалност и за судбината на малите луѓе и не дозволуваме да нe` импресионираат политички минливи играчи кои си замислуваат дека имаат големи улоги – велат музичарите и додаваат дека не би ја оставиле музиката за политичка кариера.

Групата функционира 37 години и има издадено 14 албуми. Од почетокот имаат променето многу нешта меѓу кои и својот звук.

- Но имавме среќа што нашите песни сето ова време лесно го пронаоѓаа својот пат до срцето на луѓето и немавме потреба да се држиме до некакви трендови и да одиме во чекор со актуелните музички хирови. Секогаш сме се потпирале на својот сензибилитет и поглед кон светот. Мислам дека „Прљаво казалиште“ сите овие години има создадено свој препознатлив ракопис. Сепак, не може да се побегне самиот од себе - додаваат тие.

Тешко им е да издвојат омилена песна од репертоарот кој пополека го градат од 70-тите години. На прашањето како било на регионалната сцена пред три децении, а како е денес, велат дека тешко е да се споредат времињата. Особено поради фактот што светот денес се менува повеќе за една година отколку што некогаш се менуваше за 20.

Нe слушаат и деца.

- Пред се`, мислиме на технолошкиот напредок. Денешните генерации минуваат поинаков пат за да успеат во музиката, но не се знае дали им е потешко или полесно. Не постои рецепт за успех. Сепак, сите ние бевме фантастични играчи подготвени да се докажуваат и бевме непоколебливи и бескомпромисни. Прашање е дали денешните деца се такви. Сите се надеваат на инстант-успех. Но драги деца, преку трње се стигнува до ѕвездите! - посочуваат тие.

Една од најголемите бендовски гордости е дека нивната музика ја почитуваат и фанови од помладата генерација.

- Секогаш во првите редови на нашите концерти има деца што се родиле многу подоцна од нашите песни. Тоа е знак дека нашиот материјал го надживеа своето време и преминува од генерација на генерација. А тоа е неповторливо чувство на радост и среќа и се надеваме дека ќе трае уште многу долго - завршуваат тие.

Андриjана Андова

Би можело да ве интересира:

Брачен пар, кој не сака деца пред да го прошета светот, е мета на осуда: „Прво сакаме да уживаме во ... „Сакаме деца еден ден, но прво сакаме да уживаме во слободата. Не попуштаме под ...

„По 2 години повторно имаме секс со сопругот, но дознав дека тој флертува со 4 жени и фантазира за н... „Кога се соочив со сопругот, тој рече дека сум глупава, бидејќи сето тоа е само ...

„Се борам да сврзам крај со крај за да купам храна за децата, но тоа не значи дека сум лоша мајка“ „Стигнав до касата и немав доволно пари за да платам. Луѓето почнаа да зјапаат в...

Беше само 1 година постара од зетот - Што знаеме за мајката на Меланија Трамп која почина на 78 годи... Мајката на Меланија Трамп почина на возраст од 78 години. Што знаеме за жената к...

„Косата на најдобрата другарка на ќерка ми е полна со вошки, а мајка ѝ е веган и не сака да ги убие ... „Косата на девојчето, кое е најдобра другарка на ќерка ми, е полна со вошки. Реш...

„Ангелот на смртта“ - Жена од САД отворила клиника за гладни деца во Уганда, ги лекувала без лиценца... Тврдејќи дека била испратена на мисија од Бог, Американката Рене отворила клиник...