Данска повеќе не е на прво место: Која е најсреќната земја во светот?

Одново пристигнаа резултати за тоа која е најсреќната земја во светот и според нив, Америка станува „потажна“, а за поголемиот број луѓе, потребни се многу повеќе од само пари за да бидат среќни.

Норвешка се најде на првото место и покрај покачувањето на цените на горивото, што има голема улога во економијата. Заработката во Америка е зголемена, ама среќата е намалена.

Минатата година, САД беше на 14-то место, Велика Британија на 19-то, Германија на 16-то, а Франција на 31-во место.

„Човечките работи се далеку позначајни. Ако парите прават потешкотии во одржувањето на односите со другите луѓе и врските со блиските, тогаш едноставно, не вредат“ - вели водечкиот автор на истражувањето, економистот Џон Хеливел од Универзитетот во Британска Колумбија, Канада.

Норвешка се помести од четвртото на првото место и со тоа ја бутна Данска едно место подолува, земјата која долго време се сметаше за најсреќна земја во светот.

„Она што функционира во нордиските земји е чувството на заедништво и разбирањето помеѓу луѓето“ - објаснува Хеливел.

Тоа не значи дека воопшто не ви требаат парите за да бидете среќни, а тоа го докажуваат земјите кои се наоѓаат најдолу на листата, а се истовремено и меѓу најсиромашните земји во светот.

Централноафриканската Република се најде последна на листата, покрај Бурунди, Танзанија, Сирија и Руанда.

Истражувањето вклучува 155 земји, а е базирано на бруто домашниот производ, просечниот животен век на луѓето и 4 различни анкети кои го мерат задоволството од животот на луѓето.

Еве кои се топ 10-те најсреќни земји во светот:

1. Норвешка

Норвешка има највисок бруто домашен производ, одличен здравствен систем и економија која постепено расте секоја година.

2. Данска

Данска можеби падна на едно место подолу, ама во сите мерки сè уште котира многу високо.

3. Исланд

Во Исланд луѓето најмногу се чувствуваат блиски едни со други. Дури 99% изјавиле дека секогаш имаат барем еден сосед на кој можат да се потпрат кога им е тешко.

4. Швајцарија

Од тоа колку слободни денови ќе имаат работниците до тоа колку имигранти можат да влегуваат во земјата - во Швајцарија за сè се гласа. Тука постои систем на директна демократија, што значи дека граѓаните имаат чувство дека се дел од секоја активност која е поврзана со државата.

5. Финска

Финска се наоѓа меѓу земјите со најквалитетен образовен систем.

6. Холандија

Во Холандија луѓето среќата ја откриваат на уште многу млади години. Според истражувањето, децата во Холандија се најсреќни.

7. Канада

Канада има понизок бруто домашен производ од својот сосед Америка, ама се далеку посреќни. Тоа е доказ дека само парите не ја одредуваат среќата.

8. Нов Зеланд

Во Нов Зеланд, најголемиот дел од граѓаните се среќни не само надвор од работното место, туку и додека се на работа.

9. Австралија

Во Австралија живеат безгрижни жители кои истовремено котираат високо и на просечниот животен век.

10. Шведска

Во основа, Шведска го држи ова место веќе неколку години затоа што жителите имаат здрав баланс меѓу времето за работа и одмор. Имаат висок бруто домашен производ, еднаквост па дури и 16 месеци платено породилно отсуство кое може да биде поделено помеѓу мајката и таткото.

Н. Г. | Црнобело