4 реченици кои секој работник сака да ги слушне од шефот

Да се најде работа во денешно време е еднакво на чудо, а да се има добар шеф – уште поголемо чудо. Сепак, некои ја имаат среќа да ги имаат и двете и искрено им завидуваме на таквите.

Во меѓувреме, еве кои четири реченици сака да ги слушне секој работник од страна на својот претпоставен на работното место:

„Одлично напредуваш“

Вие секако сте свесни дека вложувате многу труд и давате сè од себе на работа, но чувството да се добие таква пофалба е скапоцено. Едноставно се охрабрувате и се мотивирате. Воедно, сфаќате дека шефот е емпатичен, ја забележува вашата трудољубивост и не е горделив или егоистичен, некој кој сака да се истакнува само себеси, туку ги истакнува и оние кои вредат.

„Ти благодарам“

Точно, вие сте на работа да работите и сте платени за тоа. Но, добрите зборови како те молам или благодарам не попусто отвараат железни врати. Доблеста да се каже благодарам зборува дека никој не ве зема здраво за готово и сте почитуван и ценет. А секој сака да се чувствува така на работното место.

„Среќен сум што си дел од тимот“

Цело е кога има сè, и вие сте дел од целото. Колку е непријатно да се слушне она добропознато – Никој не е незаменлив. Ви се вртат цревата, ви доаѓа да врескате. Наместо таа изрека, шефот ви кажува дека е среќен што сте незаменлив дел од тимот и вршите одлична работа.

„Ќе добиеш покачување на платата“

Музика за нашите уши, јаготка на тортата, сублимат на сите горенаведени пофалби. Убаво е кога се добиваат и слушаат, но на крајот од денот тапкањето по рамо не вреди ништо без финансиска сатисфакција.

(О)Милена | Црнобело