9 одлични трикови за оние кои не можат да спијат во авион

Вистински среќници се оние луѓе кои успеваат да се опуштат и да спијат во авион. Поголемиот дел страдаат од анксиозност врзана со полетувањето, а на некои едноставно им е непријатно да здремат во близина на толку многу патници.

Сепак, дремката во авион може да биде пријатна и пожелна особено ако се работи за долг и напорен лет.

Патниците кои во просек поминуваат многу повеќе време во авион отколку сезонските патувачи ги споделија своите трикови за оние кои мака мачат да склопат очи во „железните птици“:

Најдобро време за летање – е ноќно време

Доколку имате можност да го бирате времето на летот, секогаш бирајте лет во доцните вечерни часови. Бидете активни во текот на денот повеќе од вообичаено за да се уморите и полесно да заспиете за време на летот.

Најмалку гужваници има во вторник и среда

Нималку изненадувачки истражувањата покажуваат дека најмалку гужва и патници има во вторник и среда, денови означени како „непопуларни“ за летање, за разлика од петок кога би се соочиле со поголем хаос околу вас и поголема тешкотија за слатка дремка.

Секогаш бирајте седиште до прозорецот

Доколку имате опција секако, бидејќи главата лесно може да си ја наслоните покрај прозорецот. Другиот тип на седишта вообичаено се резервирани за семејства со мали бебиња, а тие нормално имаат тенденција да бидат погласни отколку другите патници.

За крај, одбегнувајте ги седиштата во близина на тоалетот поради честата фреквенција на патници.

Навалете го седиштето колку што е можно повеќе

Слично како и во автобус, многу попријатно е кога седиштето е навалено под агол од 75, наместо 90 степени. Секако, консултирајте се со патникот позади вас да не му пречите, бидејќи бон-тонот и доброто однесување секогаш треба да се стават пред сопствената комоција.

Облечете се удобно и топло

Немојте да се водите според надворешните температури, во авионот е секако неколку степени поладно. Облечете пријатна памучна облека во која ќе се чувствувате удобно. Секогаш носете нешто со долги ракави за секој случај, бидејќи како што вели народната поговорка „Кој носи, тој не проси“.

Добро наместете го сигурносниот појас

Најдобро е да не го остранувате заштитниот појас за време на летот. Само внимавајте да го наместите добро врз облеката каде што нема да ви пречи, а предноста е што и при најмали турбуленции никој нема да ве разбуди откако добро сте здремале за да го ставите појасот на себе.

Носете додатоци кои го олесуваат спиењето

Перниче за удобно потпирање на главата, таблети на природна база (вообичаено содржат мелатонин) за опуштање и полесно заспивавање, темен превез за очите и задолжително чепови за уши или слушалки за музика кои ќе ги блокираат звуците од останатите патници и бучавата.

Наместо гаџети, понесете си книга

Светлината на екранот од таблетот, лаптопот или телефонот ќе ве ококорат уште повеќе наместо да ве успијат, бидејќи ви го активираат мозокот.

Наместо вакви уреди извадете некоја по малку досадна книга која полесно ќе ве успие или пуштете си релаксирачки звуци, како оние кои имитираат амбиент во тропска шума или паѓање дожд.

Не се прејадувајте

Доколку сакате полесно да заспиете за време на летот правилото е едноставно: немојте да пиете премногу течности и не се прејадувајте. Избегнете го одењето во тоалет колку што можете повеќе, а премногу храна ќе ви создаде стомачни тегоби поради варењето.

Колку и да звучи примамливо избегнувајте алкохол за време на летањето, бидејќи ќе ви предизвика главоболка и ќе ве направи мамурни. Пијте вода и останете хидрирани. Јадете нешто лесно и во помала количина, сонот ќе ви биде загарантиран.

(О)Милена | Црнобело