Холивудски ѕвезди кои никогаш не глумеле во добар филм

Вкусовите се различни, но според оцеките на љубителите на филмови, на некои актери навистина не им било пишано да се појават во квалитетно кинематографско остварување. 

Според оценките на критичарите и публиката, холивудските ѕвезди кои никогаш не глумеле во добар филм се:

Ештон Кучер

По сѐ изгледа, на Ештон Кучер му е судено да остане запаметен по „That '70s Show“. Иако многу од неговите филмови (особено романтичните комедии) постигнаа успех, баш и не може да се каже дека беа претерано добри и квалитетни.

А, славниот актер беше уште понеубедлив со неговите улоги во сериозни филмови, како на пример улогата на Стив Џобс во неуспешната биографска драма „Jobs“. Барем според рецензиите на престижните филмски сервиси, како IMDB или Rotten Tomatoes.

Тејлор Лаутнер

До ден-денес, Тејлор Лаутнер е препознатлив единствено како вториот машки лик од филмската сага „Twilight“. За разлика од Роберт Патинсон, кој својата актерска умешност ја покажа во уште низа одлични филмови, на неговиот колега тоа воопшто не му појде од рака.

Од завршувањето на последното продолжение поминаа 5 години, а тој доби главна улога во само три филмови. Меѓу нив е и „The Ridiculous 6“, еден од ретките наслови што имале рејтинг од 0% на Rotten Tomatoes.

Роб Шнајдер

Роб Шнајдер ја започна кариерата како стендап комичар, а неговиот талент го препознаа и луѓето од емисијата „Saturday Night Live“, каде неколку години беше ангажиран како сценарист.

Меѓутоа, кога одлучи да заплива во актерските води, нештата отидоа во погрешен правец. Можеби имаше неколку хитови на почетокот од кариерата, но мошне брзо стекна лоша репутација во браншата, со дури три негови филмови кои имаат рејтинг од 0% на Rotten Tomatoes.

Џенифер Лав Хјуит

Ако сте биле тинејџери кон крајот на '90-тите, големи сте шансите дека сте биле вљубени во Џенифер Лав Хјуит. За жал, ѕвездата на просечниот хорор серијал „I Know What You Did Last Summer“ од тоа време, не се појави во ниту еден друг филм кој е достоен да му посветите внимание.

Последната деценија главно ја гледаме во серии („Ghost Whisperer“, „The Client List“, „Criminal Minds“...), а земајќи ги предвид критиките објавени на Rotten Tomatoes, од порталот Slate беше прогласена за најлоша актерка од 1985 година наваму. Неласкава титула, зар не?

Џаред Падалеки

Освен фановите на хит серијата „Supernatural“, актерот не освои нови обожаватели со улогите во долгрометражни играни филмови.

Без разлика дали се појавува во само неколку сцени („Flight of the Phoenix“), или пак, ја толкува главната улога („Friday the 13^th“), ниту едно филмско остварување на Џаред Падалеки не му донесе поголеми симпатии од споменатата серија, која и понатаму е неговиот заштитен знак.

Фифти Сент

Раперот Фифти Сент не е единствениот кој се обиде покрај во музиката, да изгради име и во светот на филмот. Но, за разлика од реномето кое денес го ужива Вил Смит, тој не успеа ни да се доближи до посериозен статус во Холивуд.

Дури и при неговото деби на големото платно, каде буквално „се глумеше“ себеси, не се прослави со улогата. Меѓутоа, мора да му се оддаде чест за трудот.

За потребите на филмот „All Things Fall Apart“, во кој толкуваше лик на спортист што боледува од рак, Фифти Сент ослабе драматични 25 килограми. Сепак, ниту тоа не го поштеди од фијаско – филмот се лизна пред публиката, а критиката го столчи.

Меган Фокс

Ѕвездата на „Transformers“ не успеа да се наметне како сериозна глумица, па луѓето првенствено ја третираат како уште една убавица во Холивуд, која набрзо ќе биде заборавена. Дали е тоа поради лошиот избор на филмови или недостатокот на талент?

Првото секако игра улога, во што може и самите да се уверите ако ги погледнете рејтинзите на нејзините досегашни постигнувања. Од друга страна, не баш секој почнува да се занимава со глума за да ѝ се допадне на критиката.

Па, доколку целта ѝ била да има само пари и популарност, тогаш Меган дефинитивно успеа во својата намера.

Даниел Болдвин

Имате омилен филм од Даниел Болдвин? Не, тоа дефинитивно не е негов филм. Во него веројатно глуми Алек Болдвин. Или можеби Стивен Болдвин. Па, дури и Вилијам Болдвин.

За разлика од неговите браќа, кои беа повеќе или помалку успешни во своите актерски кариери, Даниел Болдвин е единствениот кому навистина не му се посреќи во Холивуд.

Се појави во над 100 филмски наслови, а ниту еден од нив не вреди да се спомне.

Крис Клајн

Во филмската биографија на Крис Клајн, запишани се единствено улогите што од него подразбираа две работи: да биде згоден и да се смешка. Налик на колешката Меган Фокс, актерот се стекна со инстант слава, исклучиво благодарение на убавината, а не на врвниот талент за глума.

А, гледајќи ги видеата од аудициите на Крис што испливаа на интернет, лесно е да заклучите и зошто физичкиот изглед му е главен адут за добивањето улоги, а филмот „American Pie“ и понатаму негов најголем дострел во кариерата.

 М. А. | Црнобело