Словенија прва стави крај на епидемијата од европските земји – нема продолжени финансиски мерки

Детали

петок, 15 мај 2020

Словенија е првата европска земја која стави официјално крај на епидемијата со корона вирусот, а со тоа се скратија финансиските мерки, но не и оние за заштита на граѓаните.

Словенија успеа добро да се справи со епидемијата и покрај тоа што на почетокот зема поголем замав и рашири страв кај граѓаните.

Во последниот период бројот на новозаболени е целосно намален и во последните 14 дена имаат вкупно 35 новодијагностицирани пациенти, а Националниот инситут за јавно здравје укажал дека сите индикатори водат кон намалување на ширењето и е одлучено да се прогласи крај на епидемијата.

Со тоа, финансиските мерки кои важат за помош на граѓаните и компаниите важат до крајот на мај, а потоа се укинати.

Сепак, мерките за заштита од вирусот, како носење маски и одржување дистанца, остануваат да важат, но граѓаните и животот во земјата полека се враќаат во нормала.

Од оваа недела, јавниот превоз во Словенија почна да функционира, но со ограничен број на патници кои задолжително носат заштитни маски и влегуваат на задната врата за да немаат контакт со возачите.

На влез во продавниците се одржува строг ред со почитување на мерките за заштита и дезинфекција. Градинките почнуваат да работат за оние кои сакаат да ги однесат децата, а училиштата се очекува да се отворат од следната недела, но не за сите генерации.

Карантинот по влегување во земјата е укинат за сите освен за земјите кои не се дел од ЕУ, со исклучоци.

Инаку, до 14.05.2020, во Словенија се регистрирани вкупно 1.464 случаи со корона вирус, од кои оздравени се 267, а починати 103. Во земјата се направени вкупно 66.678 тестирања.

Според нив, најважните мерки за спречување на ширење на заразата е тестирањето пациенти, изолирање пациенти, наоѓање контакти, задолжителен карантин за блиските контакти, лична хигиена, носење заштитни маски и одржување дистанца.

М. М. | Црнобело / фото: depositphotos.com