Flying-V: Револуционерен нов дизајн на комерцијалните авиони

Како што се зголемува заканата од климатските промени, компаниите ширум светот се обидуваат да најдат начин да ја намалат нивната емисија на јаглерод. Една од компаниите кои најмногу се истакнале со своите идеи е од авионскиот сектор.

 

Новиот авион познат како Flying-V, кој е инспириран од истоимената гитара од Gibson, троши 20% помалку гориво дури и од најефикасниот авион.

Уште подобро е што не мора да чекаме долго, бидејќи прототипот на моделот ќе го има првиот лет подоцна оваа година.

Концептот бил развиен од истражувачите на Технолошкиот универзитет Делфт во Холандија, а проектот е финансиран од KLM. Доколку сè оди по планот, наскоро ќе ги гледаме овие авиони на небото.

 

Иако распонот на крилја е ист како и кај обичниот авион, кај овој модел патниците се сместени во крилјата. Ова значи дека авионот ќе собере и до 314 луѓе, во простор кој обично е оставен празен.

Токму овде се крие ефикасноста за трошење на гориво.

Според Питер Елбрес, извршниот директор на KLM, со намалувањето на емисијата на јаглерод од авионите и намаленото трошење на гориво, овој проект има потенцијал да биде пионер во „одржливата авијација“.

Но, што е со внатрешноста на леталото? Иако ни се познати малку детали, Питер Винк, инженер кој работи на проектот, споделил неколку информации:

„Новата форма на леталото значи дека имаме возбудливи можности за дизајнирање на ентериерот, правејќи го летот поудобен за патниците.

На пример, како дел од истражувањето, бараме нови опции за одмор или јадење на авионот. Служење храна од бифе е една од опциите што ги разгледуваме.“

Во октомври оваа година ќе биде тестиран моделот на Flying-V со цел да се открие дали леталото ќе ја одржи стабилноста кога лета со помала брзина.

Доколку ова тестирање е успешно, ќе следат уште неколку тестови, по кои леталото ќе почне да се употребува и во комерцијалните летови.

Спирова С. | Црнобело