„Лесно е да се стигне до врвот, тешко е да се остане таму“ - да беше жив, денес Тоше ќе наполнеше 39

25 јануари. Да беше жив, нашиот Тоше Проески денес ќе наполнеше 39 години. Со најуспешната кариера на кој било пејач на македонските простори. Со неговата публика, со неговото ѕвездено небо.

Не штедејќи го гласот. Не штедејќи ги убавите зборови за неговата Македонија. Не гледајќи во часовникот што побрзо да заврши концертот.

Оставајќи го срцето на сцената, таму некаде за сите кои купиле билет во потрага за поубави соништа. На тој начин го полнам моето срце, со вашата енергија и љубов. Барем така велеше Тоше.

Тој не сонувал дека ќе стане она што беше. Во едно интервју изјави дека сонувал да стане војник или доктор. Но ништо од тоа не му се остварило. За среќа, љубовта ја изразуваше на најубавиот начин, преку музиката.

Секој може да стане пејач. Ретко кој може да стане ѕвезда. И притоа да остане човек.

Појавата на Тоше беше чиста космичка енергија – ангелски глас, енергија, харизма и прекрасна насмевка.

„Лесно е да се стигне до врвот, тешко е да се остане таму“, ќе кажеше Тоше. Она што ние сакаме да му го кажеме денес е дека тој никогаш и не се симна од него.

Засекогаш ќе останеш таму каде што си, горе, недопрен на врвот, меѓу ѕвездите…

©CRNOBELO.com Забрането преземање и копирање. Крадењето на авторски текстови е казниво со закон.

Автор: (О)Милена | Црнобело