Да си жив, да бидеш здрав, да не должиш никому ништо - што е среќа?

Среќа е да се има покрив над главата. Среќа е да се стави јадење на масата. Среќата значи да го вкусите првото утринско кафе, топло, вкусно и мераклиско во 5 минути тишина само за себе.

Среќа е да има барем една личност во животот која ќе ви каже дека ѝ недостигате, дека сака да ве види, дека ја правите среќна. Среќа е да се сака. И да се биде сакан.

Среќата значи здравје. За себе и за своите најблиски, најсакани. Среќа е кога си здрав, кога не те оптоваруваат грижи во врска со добросостојбата на телото и умот.

Дај боже среќата да се криеше во материјалните работи, иако многумина го мислат токму ова. Камо среќата да можеше да се купи со скапи парталчиња, со големи куќи и станови и луксузни автомобили. Да, привремено ќе бидеш среќен. Но, по некое време ваквата привидна среќа ќе избледи.

Среќата е во малите нешта. Среќа е да си насмеан. Да заспиваш мирно, без грижа на совест. Среќа е да сонуваш убави соништа. Среќата значи да имаш верба. Верба во некого, во нешто. Среќа е да се има надеж која никогаш не згаснува, макар и да тлее како мало пламенче дури и при најсилната бура.

Среќа е да не должиш никому ништо. Среќа е да имаш „образ“, среќа е да не се срамиш од себе, од своето минато, од твоите, од она што си. Среќа е да се сакаш себеси.

Среќа е да бидеш жив. Да можеш да го вдишеш секој нов ден во градите и да го впиеш со очите.

Среќа е да те гушне некој со сета сила додека не ти затрепери срцето и не ти крцнат коските. И среќа е да возвратиш на таква прегратка.

Среќата значи да си слободен. Да одиш онаму каде што сакаш, да го правиш тоа што душата ти сака и да бидеш она што вистински си.

Среќата значи да се нема предрасуди, да не се облеваш со злоба или горчина. Среќа е да имаш искрени емоции, топло срце, чиста, неизвалкана душа.

Среќата е она што си го крои секој од нас за себе. И малку ѕвездена прашина од небото.

©CRNOBELO.com Забрането преземање и копирање. Крадењето на авторски текстови е казниво со закон.

Автор: (О)Милена | Црнобело