Од ракометар до сликар - Погледнете го шарениот свет на Влатко Тасевски

Велат дека секој се раѓа со некаков талент, и секој има дарба да го разубави светот околу него. Приказната за Влатко Тасевски (27) од Куманово е спој на две спротивности. Во првата главниот двигател е топката, а во втората четката и боите.

Влатко на своите 11 години во основното училиште Браќа Миладиновци почнал да тренира ракомет. И тоа кај професорот Димитар Антевски, кој бил неговиот прв тренер. Но, љубовта спрема уметноста започнала многу порано.

Некаде на петта-шеста година, во Битола, во истата зграда каде што живеела баба му. Над нивниот кат живеел еден млад уметник и тука за прв пат Влатко почнал да црта и да ги учи основните работи околу цртањето.

Прво почнал да црта портрети, а подоцна се префрлил и на графити откако го заинтересирала урбаната уметност.

„Паралелно ги работев и двете работи. Не можев да се одлучам во што повеќе уживам. Преку ден одев на тренинзи, а после вежбањето, цртав“, споделува Влатко Тасевски.

„Секогаш гледав колку што е можно да го балансирам времето. Но, имаше периоди кога играв за некоја екипа надвор од државата и тогаш речиси и да немав време да се занимавам со уметноста. Но, сега, веќе неколку месеци не играм за никој тим, така што целосно се посветив на цртањето“.

Влатко најмногу сака да слика портрети и да игра со комбинација од бои. Сé зависи што сака да пренесе преку делото. Користи акрилни и маслени бои, но понекогаш комбинира и други техники, како графит и акварел.

А, кога станува збор за неговите омилени уметници, вели дека ги има многу и дека го интересираат повеќе стилови. Делата на Микеланџело, Караваџо, Рембрант, Матис, Шишкин, Пикасо и Ротко се оние кои најмногу го воодушевуваат. 

Во моментот работи на неколку портрети од девојки и во следните неколку месеци планира да направи изложба на своите дела.

 Автор: Евгениј Хоуп | Црнобело