Бојан Ѓурчевски: „Дневна автобуска карта во Амстердам е 5 евра, а холандските села се бајка“

„Нема да го заборавам селцето како од бајките во околината на Амстердам со ветерници од 19-тиот век со кои мелат какао и произведуваат чоколадо, опколени со волшебни зелени површини, но го обожавам и урбаниот Амстердам каде пиво во кафуле е 5, 6 евра и се чувствува мирис на слобода“, вели 28-годишниот скопјанец.

Бојан Ѓурчевски (28) е апсолвент на Факултетот за земјоделски науки и храна, моментално вработен во секторот за логистика во ВИП операторот.

Обожава да патува и вели дека Италија му е во срцето и секогаш со задоволство би се враќал таму, но сега како дестинација за посета ја избра Холандија.

Проговоривме со него за впечатоците оттаму:

Колку време престојуваше таму и како се одвиваше патувањето?

Бев прилично кратко, односно на 5 дена,а патувањето дотаму беше едноставно бидејќи има директен лет со Wizz Air од Скопје до Ајндховен, кој ме чинеше околу 60 евра (со сè багажот).

Кога пристигнав на аеродромот во Ајндховен купив автобуски билет во два правци до Амстердам кој чинеше 40 евра и се упатив кон Амстердам. По пат забележав како од една прилично индустриска зона (по некоја професионална деформација ги анализирав големите и модерни магацини и логистички центри) се упативме кон огромни пространства зелени површини со типични холандски куќарки со добиток и голем број на канали и водени површини бидејќи како што знаете земјата е под морското ниво.

Инфраструктурата и патот до Амстердам се предобри и се стигнува за околу час и 15 минути.

Го сакам Амстердам затоа што...

Амстердам е магичен - мирис на слобода, живописни градби со типична холандска архитектура од 17-тиот век, безброј канали и мовчиња и многу велосипеди.

Има навистина малку моторни возилa, воздухот е чист, насекаде шетаат туристи, има кофишопови и преплавен е со уметност и музеи.

Го посетив музејот Rijksmuseum каде што видов едни од најголемите уметнички дела како битката кај Ватерло на Jan Willem Pieneman, aвтопортретот на Vincent Van Gogh - една од првите селфи фотки, дела од Vermeer и како круна на музејот на најгорниот кат волшебната Nightwatch od Rembrandt.

За сместувањето и цените...

Секогаш каде и да патувам користам сместување кое го букирам преку Airbnb или Booking зависи каде ќе најдам нешто прифатливо со цена, но да ги има сите услови кои ми се потребни.

Бев сместен бев во Хаарлем, на страна од хаотичниот центар на Амстердам. Бев на 15 минути со воз од центарот или 30-40 минути со велосипед.

Возовите се достапни постојано и буквално има на секои 5 минути од сите правци. Билетите се движат од 6 до 10 евра.

Пиците се од 5 до 10 евра во зависност од ресторанот и неговата локација, автобуска дневна карта е 4-5 евра, пиво во кафуле е 5-6 евра, а во маркет од 1,5 до 3 евра.

Кога мислам на холандско село мислам на...

Zaanse Schas (Zaandam) - селце како од бајките во околината на Амстердам со ветерници од 19-тиот век со кои мелат какао и произведуваат чоколадо, опколени со волшебни зелени површини и куќарки како од приказната за Ивица и Марица. Се наоѓа покрај реката Zaan.

Какво искуство имаше со локалците?

Прељубезни се и сите зборуваат англиски. На почеток од немање недоволно култура за велосипед ги нервирав одејќи по патеките за велосипедисти. Имаат буквално развиено цела сообраќајна мрежа со пешачки премини, семафорчиња итн.

Највкусен холандски специјалитет...

Како љубител на храната од улични тезги би ги издвоил холандските baby pancakes, тоа се оние мали палачинки со шеќер во прав и чоколаден прелив, кои ги приготвуваат со невидена вештина.

Наредна дестинација на листата...

Не знам долга е листата, но можеби Португалија или Шпанија.

Фотки од неговото патување:

• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
•  

С. С. | Црнобело