Шест знаци дека ги триете забите додека спиете (дури и ако не сте свесни за тоа)

Ако се будите со главоболка или вкочанета вилица, голема е веројатноста дека имате бруксизам, односно дека навечер ги триете забите.

Триењето на забите за време на спиење, познато како бруксизам е не така ретка појава, иако повеќето луѓе не се ни свесни дека го имаат овој проблем.

Ако не се третира, бруксизмот може да се одрази негативно врз оралното здравје, па затоа е важно да бидете свесни за симптомите.

Шест можни знаци дека ги триете забите кога спиете:

Главоболки

Поради притисокот кој се создава на вилицата, триењето на забите може да предизвика главоболка.

Па, ако наутро чувствувате главоболка, особено на слепоочниците и околу ушите, можно е да ги триете забите.

Болка во вилицата

Истото важи и ако наутро забележувате болка или вкочанетост во вилицата.

Ова чувство може да трае неколку минути, но и неколку часови, а е најизразено веднаш штом ќе се разбудите.

Болка во забите

Ако ве боли заб, најчесто причината е кариес.

Но, ако немате расипани заби, а сепак чувствувате болка, и тоа во повеќе заби, можно е да се соочувате со бруксизам.

Оштетени заби

Доколку забележувате дека некои заби ви изгледаат оштетено, па и истругано, веројатно причината е бруксизам.

Исто така, ако забите ви се кршат често, и тоа може да биде знак дека ги триете навечер.

Чувствителност на топло и ладно

Бидејќи бруксизмот може да го оштети заштитниот слој на забите, тие може да станат и почувствителни на топло и ладно.

Ако немате расипани заби, а сепак забележувате дека се почувствителни, консултирајте се со заболекар.

Замор во текот на денот

Иако можеби вие не забележувате, поради бруксизмот можно е да се будите почесто во текот на ноќта.

Ова, секако, ќе направи да се чувствувате уморно во текот а денот, дури и ако сте си легнале рано.

Што да правите ако забележувате симптоми?

Ако забележувате и само еден од наведените симптоми, секогаш е препорачливо да се консултирате со вашиот стоматолог.

Доколку тој утврди дека ги триете забите, може да ви препорача штитник за заби кој се носи навечер.

Исто така, препорачливо е да го регулирате стресот, па и да се консултирате со експерт ако имате проблеми со менталното здравје, бидејќи доста често тие се причина за бруксизам.

Спирова С. | Црнобело