Направи сам: Уникатна ѕидна декорација

Ако сакате да пополните некој ѕид во домот со интересна слика или декорација, обидете се да ја направите сами. Едноставно е, брзо, а уникатно.

Најпрво пронајдете некоја дрвена површина која се вклопува со боите на собата. Таа ќе ви служи како подлога на која ќе го создадете вашето прво уметничко парче.

Потребно ви е:

• Нацртана фигура во форма на цвет или лист, по желба
• Волница во различни нијанси
• Клинци
• Ножици
• Селотејп
• Чекан
  
  

Постапка:

Исечете ја фигурата која ја одбравте, и залепете ја со селотејп на дрвената површина. Следно е да создадете рамка од клинчињата во истиот облик.

На ред е најинтересниот дел. Размотајте ги волниците и започнете да ги мотате по врвот на клинчињата, како на сликата.

По неколку минути откако ќе ја обоите внатрешноста, исечете го крајот и заврзете го за било кое клинче.

Повторувајте ја постапката додека не го добиете посакуваниот изглед.

Оваа уникатна декорација може да ја закачите над креветот во спалната соба, да направите мозаик од повеќе слики и да ги поставите во дневната соба или пак да направите облик на срце, мече или ѕвезди и да ја украсите собата на вашите најмлади.

Изборот е ваш...