Направи сам: Креативно користење на старите машки кравати

Кога вашата посилна половина ќе престане да носи некоја кравата, не се залетувајте веднаш да ја фрлите. Размислете на нејзината втора употреба и ќе се зачудите колку новитети може да создадете со малку креативност.

Еве неколку идеи кои ќе ве инспирираат:

Направете летна огрлица така што дрвените или пластични топчиња ќе ги обложите со материјал, а во секој меѓупростор може да заврзете по еден чвор.

На крајот, завршете ја огрлицата со голема, прекрасна машна. Идеален дезениран накит за летните денови!

Футролата за мобилен е наједноставната преобразба на краватата. Пресечете ја краватата на половина, зашијте го долниот дел, а на горното врвче додадете мало копче или лепенка која лесно ќе ја залепите кога ќе ја преклопите футролата.

Мини приврзокот во вид на кравата е одличен избор за секој маж кој постојано ги губи клучевите од автомобилот или станот. Искористете го материјалот и сошијте едно вакво слатко приврзоче.

Шарените перници се супер идеја за освежување во домот. Неколкуте стари кравати со интересни дезени зашијте ги како еден материјал со кој ќе ја обложите веќе постоечката декоративна перница.

Украсното венче е исто така супер креативен, женски проект. Од целиот материјал со кој располагате, исечете една долга лента и обложете некое обично венче, а од преостанатиот материјал сошијте цветче или машна, кое со само неколку копчиња и монистри ќе се претвори во одличен моден додаток.

Украсете ја едноставната маичка така што ќе го обложите делот околу вратот и деколтето. Завршете со некој интересен брош или копче, како на сликата.

Ламбата ќе добие нов изглед доколку капата ја обложите со шарени кравати во силни бои. Залепете од внатрешната страна и зацврснете со материјал или шарено ластиче.