На мажите, сепак не им се заканува изумирање

Теориите според кои мажите ќе изумрат поради исчезнувањето на Y хромозомот, кој го одредува машкиот пол на детето, се покажале како погрешни...

...тврди група на американски научници во новата студија.

Сценариото за неизбежното исчезнување на мажите се наметнало пред десетина години кога научниците утврдиле дека машкиот хромозом драматично се скусил – од супер Y хромозом со повеќе од 1400 гени, пред неколку стотини милиони години, сведен е сè на сè на неколку десетина гени.

Поедини автори на ова мрачно сценарио предвидуваат дека мажите потполно ќе исчезнат за околу пет милиони години, додека други тврдат дека процесот ќе биде многу побрз и дека посилниот пол ќе изумре, како прочуената птица Додо, веќе за 125.000 години.

Најновата студија на Институтот за биомедицински истражувања при Технолошкиот институт во Масачусец, меѓутоа укажува дека намалувањето на Y хромозомот се случило во далечното минато и дека од тогаш со милиони години е стабилен.

Човечкиот геном има 22 пара хромозоми плус еден со кој се одредува полот.

Жените имаат два X хромозоми, а мажите еден X и еден Y хромозом.