Совети како да го сочувате мебелот од дворот во текот на зимата

Ги пиете последните утрински кафиња на терасите или во дворовите, но полека и сигурно доаѓа време кога треба да ги соберете парчињата мебел за да ги заштитите од дождот и снегот.

Сега е вистинско време да ги засукате ракавите и да се фатите за работа.

Што треба да направите со мебелот и како да го сочувате додека трае зимата?

Дрвениот мебел

Дрвото е специфичен материјал кој на сонце избледува, а на дожд набабрува.

Токму затоа, треба да водите сметка за дрвениот мебел. Најдобро е да го ставите на суво место покриен со најлон и заврзан. На тој начин ќе го заштитите од дождот и мразот кои лесно можат да го уништат. Најдобро би било пред да го замотате да го премачкате со глазура за дрво, затоа што таа го спречува продорот на влагата.

Мебел од плетени материјали

И овие парчиња мебел треба да ги зачувате од сонце и вода. Се чуваат многу слично како и дрвените материјали, а еден од триковите е да ги премачкате со лак за бродови. И овие парчиња мебел добро  би било да ги покриете со најлони.

Метален мебел

Р’ѓата е најголем непријател на металот затоа, добро е да ги знаете овие трикови:

1. Избегнувајте го дождот, така што ќе ги складирате на некој сув простор.

2. Намачкајте ги со заштитен лак.

Камен

Камените површини се најлесни за одржување, но и нив не би било лошо да ги прекриете со нешто. Пред да ги користите следен пат, добро истријте го со четка.

Скара

Многу е важно скарата во дворот да ја исчистите по завршувањето на сезоната, за на пролет да не ве дочекаат старите маснотии залепени на скарата.