„Бев на балетот 'Жизел' - балетан од Шпанија блесна во главната машка улога и ми откри дека Скопје пријатно го изненадило“

Детали

петок, 03 март 2023

„Скопје позитивно ме изненади. Ми изгледа како навистина пријатен град. Луѓето се љубезни и имам чувство како да сум дома...“, вели за CRNOBELO.com Франциско Хименез Руиз од Шпанија, кој на неверојатен начин ја одигра главната машка улога во балетската претстава „Жизел“ и издоминира на сцената заедно со нашата Мими Поп Алексова Атанасовска.

Вчеравечер (02.03) на сцената на Националната опера и балет го проследив романтичниот балет во два чина „Жизел“, кој имаше изведба и пред неколку дена, односно на 28 февруари.

Балетската претстава започна во 20 часот, беше составена од 2 чина, со пауза од 15 минути.

Публиката со задоволство ја следеше секоја минута од ова ремек дело, каде нашите врвни балерини и балетани, како и гостинот балетан од Шпанија, Франциско Хименез Руиз, го покажаа својот раскошен талент.

Во публиката имаше вистински вљубеници на оваа уметност, облечени елегантно, токму како што заслужува еден настан од овој тип, но и ученици кои од време на време знаеја да бидат малку нетрпеливи, но професорките веднаш ги опоменуваа.

Сигурно се сеќавате и вие на училишните денови, кога ве носеле на балет и ситуацијата можеби била слична, но сепак секоја чест за ваквиот потег и организација, затоа што  дефинитивно треба да ги научиме младите како да се вљубат во балетот од најрана возраст.

Во главната женска улога, на 2-ри март, како Жизел, ја видовме нашата примабалерина Мими Поп Алексова Атанасовска, додека на 28-ми февруари во оваа улога настапила Марија Кичевска Шокаровска.

Го исконтактирав гостинот, балетан од Шпанија, Франциско Хименез Руиз да го запрашам каков впечаток му оставила нашата држава, а тој за CRNOBELO.com вели:

„Скопје позитивно ме изненади. Ми изгледа како навистина пријатен град. Луѓето се љубезни и имам чувство како да сум дома. Истото ми се случи и за време на работниот ангажман.

И Мими и Марија, покрај тоа што се одлични балерини, се и неверојатни професионалци. Ми помогнаа да се чувствувам како еден од друштвото и да растам во улогата заедно со нив. Навистина сум им благодарен.

Задоволство ми е да ја делам сцената со уметници, кои те пречекуваат на толку убав начин.“

Фото: Марко Угарковиќ (од 28.02 со Марија во главната улога)

Фото: Марко Угарковиќ (од 28.02 со Марија во главната улога)

Франциско дефинитивно владееше со сцената на Националната опера и балет и заедно со Мими мамеа воздишки со балетските чекори и позиции, а совршено надополнување им беше оркестарот на Националната опера и балет, под диригентската палка на диригентот Иван Еминовиќ.

Ја исконтактиравме и Мими Поп Алексова Атанасовска, која ја одигра главната женска улога, и таа за CRNOBELO.com вели:

„Жизел е претстава која особено ми е драга и кон која пристапив со особена почит. Претстава која бара искуство, посебна трансформација и уметничка зрелост.

Приказната го опишува романтизмот како епоха во која една млада девојка умира затоа што срцето и е скршено од болка. Љубовта, предатството во првиот чин и нереалниот свет, оној после смртта во вториот чин, бараат целосно трансформирање низ начинот на игра и емоцијата кај танчерите.

Искрено, не знам која точно изведба ја имав вчера, низ годините ја имам подготвувано и играно под менторство на различни репететори и секоја изведба за мене претставува ново искуство, трудејќи се секогаш да направам нешто подобро, поинаку за мене, или да го погледнам ликот на Жизел низ поинаква призма од претходно.“

Магичната и безвременска приказна за несреќната љубов, преточена во музиката на францускиот композитор Адолф Адам, а во кореографија на Жан Корали, Жил Перо, Мариус Петипа, Леонид Лавровски, со адаптација на кореографијата е на Ирена Пасариќ од Хрватска беше мевлем за очи и душа.

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело