Ирена Илиевска за CRNOBELO.com: „Уживав во снимањето на новата серија ‘Бистра Вода’, Македонците се жедни за македонска продукција“
- Детали
- четврток, 09 март 2023
„Кога ќе ми завршеше снимачкиот ден, ми беше жал што утре не сум повторно на снимање, просто не сакаш да си заминеш од сет. Во ‘Бистра Вода’ го играм ликот на Ана, која живее со својот татко инвалид и својот помал брат, средношколец“, вели Ирена Илиевска, за новата серија, која се емитува на ТВ Алфа секоја недела во 20 часот.
Во неделата на 5-ти март на ТВ Алфа се емитуваше првата епизода од македонската серија „Бистра Вода“ и не можеме да бидеме посреќни.
Интересна и интригантна, оваа крими серија, прва од овој тип во Македонија, нè намами едвај да го чекаме емитувањето на втората епизода.
Дел од актерскиот тим во оваа серија е и Ирена Илиевска. Таа во серијата го глуми ликот на скромната Ана.
Со неа поразговаравме какво искуство беше снимањето на „Бистра Вода“.
Инаку, сценарист и режисер на серијата е Јани Бојаџи, а актерската екипа ја сочинуваат над 70 актери од Македонија, меѓу кои Мони Дамевски, Јелена Жугиќ, Дејан Лилиќ, Зоран Љутков, Роберт Вељановски, Васил Зафирчев, Горан Стојановски, Владо Јовановски, Маја Љутков, Мето Јовановски, Јана Вељановска, Славица Манаскова, Рубенс Муратовски, Григор Јовановски и многу други.
Ирена за CRNOBELO.com вели:
„Бистра Вода беше едно од поголемите актерски искуства пред камера за мене.
Неверојатно е колку многу ни недостасува да се снима повеќе и почесто. Неретко кажувам дека тоа е сосема различна професија, со сосема различен пристап, подготовка и реализација, од театарската пракса.
Како и да е, и двете бараат сериозен пристап, анализа, претходна подготовка и пракса пред сè, затоа што ова коешто го работиме е жива материја, не е нешто што може да се научи од книга, да се седне во канцеларија и да се применува, тука праксата е пред сè.
Токму затоа имаме потреба од многу повеќе вакви проекти.
Со режисерот на серијата Јани Бојаџи се познавам веќе 10 години и исто толку години соработуваме. Досега сме работеле на театарски, филмски и телевизиски проекти, па оттаму слободно можам да кажам дека Јани е единствениот режисер, кој етапно го прати мојот професионален развој.
Атмосферата на снимањето беше смирена, без никаков притисок, со многу разбирање, дискусии и многу работа. Кога ќе ми завршеше снимачкиот ден, ми беше жал што утре не сум повторно на снимање, просто не сакаш да си заминеш од сет. Кога имате таков процес, не може да немате добар продукт.
Позитивно сум изненадена и возбудена од тоа како луѓето ја прифатија првата епизода и со какво нетрпение ја очекуваат секоја наредна.
Можам да им ветам дека ќе уживаат во секоја епизода, а возбудата и исчекувањето да видиме што следи, ќе расте сè повеќе и повеќе.
Не ја кријам среќата што сум дел од првата крими серија во Македонија. Колку и да е чудно тоа, но нашите соседи од Балканот веќе одамна снимаат ваков тип на серии, а ние сега за првпат го правиме тоа.
Сепак, мора од некаде да се почне и искрено се надевам дека „Бистра вода“ ќе биде почеток и поттик за една серија од нови проекти. Исто како што се надевам и знам дека „Бистра Вода“ нема да застане тука.
Народот е жеден за своја продукција, за македонски филмови и серии и затоа овој „инцидент“, мора да стане пракса.
Воопшто не сакам да откривам предвреме за дејствието и за мојот лик, со цел да ја задржиме возбудата и исчекувањето до крај, но ќе се обидам да зборувам без да откријам премногу.
Во „Бистра Вода“ го играм ликот на Ана, која живее со својот татко инвалид и својот помал брат, средношколец, тие воедно се и единственото сиромашно семејство во серијата.
Ана е одраз на чесноста, пожртвуваноста, знаењето, борбата со сè што е гнило во општеството, од директори, институции и ред други неправди со кои таа мора сама да се избори, за да може да го износи својот товар на плеќите и да го издржува своето семејство.
Целата нејзина приказна доживува огромен пресврт, па останува да видиме до крајот дали Ана ќе потклекне на притисоците или правдата ќе дојде по своето и ќе ги израмни сметките.
Доволно е за сега, сепак најмногу сакам изненадувањата да останат изненадувања.“
©CRNOBELO.com Забрането преземање и копирање. Крадењето на авторски текстови е казниво со закон.
Симона Симионова | Црнобело
Би можело да ве интересира:
Препорачуваме
Најчитани неделава
