Првата официјална фотографија од свадбата на Новак и Јелена

Детали

понеделник, 14 јули 2014

Вестите за венчавката на Новак и Јелена ги пренесоа сите светски медиуми, а магазинот Hello ги има првите свадбени фотографии.

Првиот тенисер во светот и неговата избраничка по 9 години врска решија да застанат пред олтарот на островот Свети Стефан и да го кажат судбоносното „да.“

Тоа го направија пред мермерна купола која била изработена посебно за оваа прилика, пред своите најблиски пријатели и семејството.

Млада одлучила да го земе презимето на својот сопруг, па од сега ќе се претставува како Јелена Ѓоковиќ.

Актуелниот шампион за кум го одбра својот другар од детството, Невен Марковиќ, додека старосватицата на Јелена е непозната за јавноста.

Прекрасната церемонија не можела да биде уништена ниту од лошото време, пропратено со дожд и грмотевици. Во моментот кога младенците ги читале своите завети силно загрмело, на што Новак искоментирал: „Ете, и Бог одобрува!“

По склучувањето на романтичниот граѓански брак, парот се венчаше во црква на 12 јули, по завршување на летниот пост.

Во првото дадено интервју Новак изјавил:

- Кога за прв пат ја видов во венчаница, како насмеана доаѓа кон мене... Изгледаше како ангел! Се обидував да бидам присутен во тој момент и да запаметам се. Бев фокусиран на неа и нејзината насмевка и нашето бебе. Тоа беше навистина совршен момент.

Јелена пак, открива дека се чувствувала многу понервозна од него:

- Бев многу нервозна и се ми беше матно. Го гледав низ солзи во очите и штом го видов заплакав. Бев толку среќна што очигледно заради бременоста е тешко да ги контролирам емоциите. Благодарна сум што го имам во животот.

Ова е првата официјална фотографија од најпрекрасниот ден на Јелена и Новак, а останатите објавени фотографии погледнете ги тука.