Метју Пери со нови детали за зависноста: „Речиси умрев од предозирање, 2 недели бев во кома и ми направија 14 операции на стомакот“

Детали

четврток, 20 октомври 2022

Ѕвездата од „Пријатели“ откри мрачни детали од неговата битка со зависноста од алкохол и лекови – две недели бил во кома, поминал неколку месеци во болница и му биле направени 14 операции на стомакот поради компликации од пиење многу опијати.

Добро познат факт е дека Метју Пери, најпознат како Чендлер од „Пријатели“, со години се бореше со зависност од алкохол и лекови.

Но, во неговата книга која беше издадена неодамна, актерот откри дека неговата битка била далеку потешка и поопасна од она што ѝ е познато на јавноста.

Сега, кога конечно успеа да се ослободи од пороците, 53-годишниот актер одлучи да ја раскаже неговата приказна, притоа споделувајќи ги и најмрачните детали. 

„Сакав да ја споделам мојата приказна сега кога сум сигурен дека нема да се вратам на мрачната страна. Чекав да бидам целосно трезен – настрана од алкохолизмот и зависноста – за да почнам да пишувам. Сигурен сум дека со ова ќе помогнам некому“, вели Метју за магазинот People. 

Актерот открива дека на 49-годишна возраст, имал само 2% шанси да преживее откако се предозирал со опијати, по што му пукнало дебелото црево.

По овој инцидент, актерот две недели бил во кома и поминал неколку месеци во болница – факт што досега не ѝ беше познат на јавноста.

Актерот открива и дека досега му биле направени 14 операции на стомакот, како и дека 15 пати бил на рехабилитација.

„Лекарите му кажаа на моето семејство дека имам 2% шанси да преживеам. Ме ставија на машина која дише наместо мене. Никој не го преживува тоа“, вели актерот за првото предозирање.

Метју открива дека до 34-тиот роденден, неговиот проблем со алкохолизмот почнал да станува очигледен.

„Се справував со алкохолизмот, но додека да наполнам 34 години, веќе запаѓав во многу неволји. Сепак, имаше години кога бев трезен додека траеше снимањето на 'Пријатели'. Бев трезен додека ја снимавме деветтата сезона“.

Во еден период додека траело снимањето на серијата, покрај алкохолот, актерот секој ден пиел по 55 апчиња „викодин“ – лек против болка. Тогаш тежел само 58 килограми.

„Не знаев како да престанам. Ако во домот ми дојдеше полиција и ми речеше ’Ако вечер пиеш алкохол, ќе те затвориме‘, самиот ќе почнев да се пакувам.

Не знаев како да престанам бидејќи зависноста е прогресивна. Станува полоша и полоша како што стареете“.

Со текот на времето, состојбата само му се влошувала, а актерот истакнува дека колегите од „Пријатели“ му покажувале многу разбирање и биле мошне трпеливи со него.

„Беа како пингвини. Во природата, кога еден пингвин е болен или повреден, останатите му помагаат. Околу него се, сè додека не оздрави. Такви беа колегите со мене“.

Актерот не открива колку долго е трезен, но вели дека го брои секој ден.

„Имам 14 лузни од операции на стомакот. Тоа се многу потсетници да останам трезен. Само треба да погледнам надолу“.

Сега актерот има за цел да им помогне и на другите кои се во иста положба како него.

„Ноќта кога првпат ме хоспитализираа, бевме пет луѓе кои нè ставија на машината за дишење. Четворицата умреа и преживеав само јас. Па, големото прашање е – Зошто? Зошто јас? Сигурно има некоја причина“.

Актерот вели дека е сигурен дека фановите ќе бидат изненадени кога ќе ја прочитаат неговата книга и ќе сфатат колку блиску бил до смртта.

„Во книгата велам дека ако умрев, луѓето ќе беа шокирани, но немаше да бидат изненадени“.

Метју открива дека и покрај многуте мрачни години, целото искуство го направило многу посилна личност.

„Најмногу сум изненаден од мојата издржливост. Тоа што можам да се вратам на нозе по целата оваа тортура. Сакав да ја раскажам мојата приказна, иако е малку страшно да ги споделите сите ваши тајни“.

Актерот истакнува дека неговата приказна сепак е и полна со надеж, бидејќи тој уште е жив.

Спирова С. | Црнобело