Кралицата има омилена снаа – Како Софи Весекс ѝ стана главна потпора во тешките мигови?

Детали

петок, 11 јуни 2021

Ако прашувате кое дете ѝ е омилено на Кралицата, одговорот е ниту едно, омилена ѝ е снаата Софи Весекс - наводно рекол еден од советниците на кралицата. Ако се следат последните случувања на кралскиот двор во Велика Британија и последните настани во кои снаата е главна потпора за кралицата, се чини дека во оваа реченица има голема вистина.

Грофицата Софи Весекс е снаа на кралицата, која е омажена за принцот Едвард – најмалиот син на Елизабета и Филип. Британските медиуми пишуваат дека жената што важи за омилената снаа на кралицата станала нејзина главна потпора по смртта принцот Филип.

Според британските медиуми Софи секојдневно ѝ се јавува на кралицата, а често патува и до Виндзорската палата за да ја посети.  

„По смртта на војводата во април, Софи неколку дена во неделата, а најчесто за викенди патува по 16km од нејзиниот дом во Багшот парк до палатата во Виндзор за да помине време со нејзиното височество. Во деновите кога не може да ја посети, војвотката од Весекс ѝ се јавува на свекрва ѝ најмалку еднаш дневно“ – пишува The Sun.   

За време на годинешната парада по повод нејзиниот 95-ти роденден што ќе се одржи во сабота (12.06) се очекува кралицата да биде придружувана од нејзиниот братучед Војводата од Кент, но зад камерите најверојатно ќе биде со Софи.

Се вели дека најверојатно пријателството помеѓу кралицата и снаата почнало затоа што тие претходно поминувале доста време заедно во прошетки и во јавање во големиот парк во Виндзор.

Додека сè уште траеше карантинот Софи изјави за Telegraph дека ги почитувале мерките за безбедност, при што за време на посетите кралицата стоела на 7m високиот балкон и оттаму ѝ мавтала. 

Иако за време на карантинот тие не можеле да се гледаат слободно, по олеснувањето на мерките Софи била една од ретките на која ѝ било дозволено често да ја посетува кралицата.

Дека кралицата има огромна доверба во својата омилена снаа укажува и фактот што таа беше избрана за ментор на Меган Маркл за „приспособување на кралскиот живот“ кога таа стапи во брак со принцот Хари.

Инаку Софи и принцот Едвард стапија во брак во 1999-тата година. Тие се запознале во 1987-та година кога таа работела како ПР за Capital Radio, но почнале да се забавуваат дури 6 години подоцна, односно во 1993-тата.

На почетокот се обидувале колку може повеќе да ги избегнат фотографите, особено кога Софи почнала да преноќува во станот на Едвард во Бакингемската Палата.

Кога Едвард ја барал на телефон Софи во редакцијата, се претставувал како Ричард, но не успеал да ги излаже нејзините колеги.

Шест години откако почнале да се забавуваат Едвард ѝ предложил брак. Сепак, кога станува збор за формирањето на семејството тие се соочија со повеќе проблеми, Софи имаше вонматерична бременост во 2001-вата година.

Две години подоцна ја роди ќерката Луиза, но и тоа породување било мошне тешко – бебето беше родено еден месец порано, а Софи загубила многу крв за време на царскиот рез и беше задржана 15 дена во болница. Во 2007-мата Софи повторно со царски рез го роди синот Џејмс. 

Инаку се вели дека Софи, Едвард и нивните деца Луиза (17) и Џејмс (13) често први доаѓаат во посета на кралицата, а последни си одат.

Сето ова укажува дека кралицата има своја омилена снаа што ѝ служи како главна потпора во тешките моменти по загубата на сопругот, но и по скандалите што принцот Хари ги предизвика од САД.

Б. С. Б. | Црнобело