Денес се слават светите Кузман и Дамјан, заштитници на лекарите - Што не треба да правите на овој ден?

Детали

вторник, 14 ноември 2023

Светите браќа целиот свој живот го посветиле на лекување на луѓето, а не барале ништо за возврат. Во синџири биле однесени кај римскиот цар кој требало да ги погуби, но откако го излекувале, браќата биле пуштени на слобода, а царот го примил христијанството како религија. Именден слават, Кузман, Кузе, Дамјан, Даме...

На 14-ти ноември православните христијани ги слават светите браќа Козма (Кузман) и Дамјан. Се смета дека овие двајца светители биле браќа по раѓање, кои биле лекари и чудотворци и затоа се верува дека денес е денот кога треба да се помолиме за здравје.

Козма (Кузман) и Дамјан се сметаат за заштитници на лекарите и медицинските работници, а се верува дека на овој ден не треба непотребно да се излегува од домот, ниту да се вршат тешки работи.

Именден слават Кузман, Кузе, Дамјан, Даме...

Браќата рано останале без татко и биле одгледани од нивната мајка која била христијанка. Наследиле голем имот, кој го разделиле на христијаните, а целиот свој живот ги лекувале луѓето и не барале ништо за возврат, заради што ги нарекуваат и бесребреници.

Се верува дека овие браќа успевале да ги излекуваат луѓето и животните само со допир на раката, а од луѓето на кои им помогнале барале само да веруваат во Христа и неговото учење.

Браќата верувале дека на овој начин ја исполнуваат Христовата заповед: „Бесплатно примивте, бесплатно давајте!“

За нивниот живот се врзуваат повеќе анегдоти. Првата е дека гонителите на христијаните ги однеле пред царот Карин во Рим, кој им наредил да се откажат од Христа и да принесат жртви на боговите.

Браќата успеале да му помогнат и да го излекуваат од болеста со која тој долго време се борел, по што тој ги пуштил да си одат, а и самиот го прифатил христијанството.

Следната анегдота се врзува за нивното бесплатно лекување. Имено, Козма (Кузман) многу му се налутил на својот брат Дамјан, откако тој прифатил да земе како награда 3 јајца од некоја жена што ја лекувал, па му рекол дека не сака да бидат закопани заедно.

Дамјан, не ги зел јајцата како награда што ја излекувал жената, туку затоа што таа го заколнала со Пресвета Богородица да ги зем.

Се смета дека двајцата браќа починале во 284-та година, откако некој лекар, кој во минатото им бил учител, почнал да завидува на нивната слава и под изговор дека ќе им помогне да собираат лековити билки, ги однел во планината и ги убил со камења.

Сепак, по нивната смрт браќата биле закопани заедно во местото Фереман, по божјо откровение.

Долго по нивната смрт се верувало дека браќата сè уште ги лекуваат луѓето и ќе им помогнат без да бараат нешто за возврат – единствено што треба е тој што е излекуван да покаже силна вера кон Христа.

Б. С. Б. | Црнобело