Македонка вежба и во осми месец од бременоста: „Свесна сум дека некои ме осудуваат, но јас ќе продолжам да ве мотивирам“
- Детали
- вторник, 27 септември 2022
„Може да осудуваат само тие што не ги знаат придобивките“ – се вели во еден од коментарите на објавата на Драгана Младеновска, фитнес тренерот која и во осми месец од бременоста активно вежба, а видеата и фотографиите ги споделува на Инстаграм.
Драгана Младеновска е магистер по фармација и диететика, аеробик и пилатес инструктор и сопственик на студио, а на Инстаграм редовно споделува објави во кои дава совети поврзани со здравиот начин на живот, рецепти за исхрана, но и семејни фотографии.
Драгана во моментов е бремена со своето прво дете, а објавува фотографии и видеа со коишто покажува дека иако е во поодмината фаза од бременоста тоа не ја спречува да продолжи со редовно вежбање.
Во обид да ги мотивира сопствените следбеници и да ја поттикне свеста кај луѓето колку е важна физичката активност, Драгана која во моментов е во осмиот месец од бременоста, појасни кои се позитивните придобивки што ги забележала кај себе, затоа што редовно вежба и во периодот од втората бременост.
Таа неодамна во Инстаграм Стори сподели видео во кое бремена држи час по степ-аеробик, кое, како што вели, било споделено над 50 пати, а сега во нова објава детално образложи што мисли на темата.
Драгана на самиот почеток напоменува дека е свесна дека некои од тие споделувања биле за восхит, а некои и за осуда.
„Вежбањето во бременост е голема табу тема кај нас и затоа воопшто и не ме чудат вакви реакции.
Бременоста не е период кога можете да постигнувате лични рекорди, но многу е важно како ќе го започнете целото „патување“.
Начинот на кој јас се однесувам овие месеци е начинот на живот кој го живеам повеќе од 15 години“ – нагласува таа.
Драгана вели дека односот кон телото што жените го имаат пред бременоста, физичката форма, кондиција и навики се клучни и од големо значење за тоа како би се одвивала бременоста.
„Првата бременост и вежбањето во текот на сите 9 месеци ми беа едно огромно позитивно искуство кое ме мотивираше да ја направам групата за трудници и низ годините наназад, а и сега да мотивирам многу идни мајки да бидат активни во бременоста.
Сега сум далеку поискусна и поуверена во сите придобивки кои ги носи вежбањето за време на бременост (секако ова се однесува за бременост која е нормална и без компликации)“ – вели таа.
Драгана појаснува дека најмногу е фасцинирана и најсреќна од тоа што во текот на сите овие месеци има супер енергија, одличен сон, нема отоци, расте бебе кое се развива одлично и функционира сосема нормално.
Нејзината објава наиде на позитивни коментари. Некои од нив ѝ аплаудираат за тоа што се обидува да ја поттикне свеста за тоа колку е важно вежбањето и во време на бременост.
„Браво! Активноста во време на бременоста носи многу придобивки“, „Може да осудуваат само тие што не ги знаат придобивките“, „И јас вежбав во текот на втората бременост и ми беше многу поубаво, подобро да се вежба отколку да има несоодветно покачување на килограмите, што ќе резултира со низа компликации“ – стои во дел од коментарите.
Напомена: Сепак, секое тело и бременост е различна и неопходно е да се консултирате со лекар пред да почнете да вежбате во бременоста. Дополнително, доколку ви биде дозволено, важно е тоа да го правите кај професионалец во областа за да избегнете несакани ситуации.
Б. С. Б. | Црнобело
Би можело да ве интересира:
Препорачуваме
Најчитани неделава
