Продавачи на тезга на Бит пазар со срце планина - вирален статус на скопјанец ни ја враќа вербата во хуманоста

Детали

среда, 08 февруари 2023

„Тие грабнаа по една кеса, ги наполнија до горе, не гледаа колку ставаат и што ставаат...“, споделува Фитим Бела за продавачите од Бит пазар, кои веднаш се понудиле да донираат за децата во Турција, погодени од катастрофалниот земјотрес.

Фитим Бела е хуман скопјанец кој одлучил да купи облека за да донира во Турција за дечињата, кои сега немаат дом и мрзнат на улица.

Но, тоа што го трогнало е кога продавачи на тезга на Бит пазар одлучиле од нив да донираат капи, шалови и ракавици за овие дечиња.

Нивниот потег го трогнал, па на Фејсбук тој сподели фотографија направена со нив и во описот напиша:

„Тезга на Бит пазар

Со сопругата ја затворивме канцеларијата, се упативме кон Скопската турска чаршија, купувавме чизми, ќебиња и застанавме токму на оваа тезга. Ги прашав овие двајца сограѓани дали имаат капи, шалови и ракавици, комплет за дечиња.

Ме прашаа за колку години и ми кажаа дека само за девојчиња имаат бои, а јас им одговорив: „Фала му на Бога моите деца имаат сè, ова ми е за донација за Турција да пратам, таму е катастрофа – леден бран и ќе има деца кои ќе мрзнат на улица.“

Овие двајца херои тогаш грабнаа по една кеса, ги наполнија до горе, не гледаа колку ставаат и што ставаат, за разлика од газди во бутици, што седат на топло.

Овие двајца херои цел ден седат надвор на ветер на студ за парче леб, но имаат срце планина, Господ да ги чува.“

С. С. | Црнобело