Топ 5 филмови со Робин Вилијамс кои ќе ве вратат во детството

Актерот и комичар, кој изобилуваше со талент за глума, еден од омилените ликови на многумина, за жал, поради тешка депресија реши да си го одземе животот на 63-годишна возраст.

Малку е неверојатно, како оној кој сите нè засмејуваше, не успеа да се расположи себе, но жалната вистина е дека најголемите комичари имаат најтажни животи.

Сепак, многу од нас пораснаа со неговите филмови и секојпат со радост ќе се навраќаат за повторно да ги погледнат.

1. „Jumanji“

Моментот кога омилената детска книга ќе се претвори во реална игра, полна со мистерија и магија, тогаш детскиот свет станува волшебен и возбудлив. Робин го игра 26-годишниот Ален кој цело време бил заробен во играта, а Џуди и Питер ќе го ослободат. Токму тогаш започнуваат авантурите кои ќе ви го задржат вниманието.

2. „Hook“

Робин како Петар Пан и Џулија Робертс како Ѕвончица. Тој мора да ја напушти сопругата со двете деца и животот како адвокат, за да се врати во Недојдија каде ќе се бори со лошите пирати, предводени од капетан Хук.

3. „Аladin“

Еден од најинтересните цртани Дизни ликови е духот од волшебната ламба на Аладин, чиј глас го позајмува токму Робин Вилијамс. Не е ниту принц, ниту принцеза, ниту главен лик, но нема некој што не го сака и не го спомнува духот на Аладин.

4. „Jack“

Еден посебно интересен, но и емотивен филм во кој Робин игра лик со здравствено пореметување, така што иако во суштина е дете, според изгледот тој расте и се развива четири пати побрзо од годините што ги има. Често исмеван, но сепак со многу добра душа и ведар детски дух. При крајот, кога сè уште оди во училиште им се обраќа на своите соученици, за да ги потсети колку е краток животот: „Направете си го животот спектакуларен“.

5. „Mrs. Doubtfire“

Еден од омилените детски филмови кога Робин Вилијамс е претворен во повозрасна госпоѓа која се пријавува на оглас за дадилка кој го објавува мајката на неговите деца, бидејќи не му дозволува да биде постојано со нив. Поради тоа, тој наоѓа свој начин и тоа го изведува речиси совршено. Многуте комични ситуации и авантурите низ кои поминуваат сите заедно ќе направат да посакате одново и одново да го гледате со уживање.

Имате вие некој омилен филм со Робин Вилијамс? Пишете ни во коментарите!