„Милион долари“ за концертот на Архангел

После двегодишна пауза кога македонски звучеше подобро, во петокот на 20 декември 2013 година се случи долгоочекуваниот концерт на Архангел со Македонската филхармонија.

Иако од легендарните членови на групата се појави само нивниот фронтмен, Ристо Вртев, Филхармонијата под диригенство на Саша Николовски – Ѓумар и во придружба на џезерот Ѓорѓи Шаревски,  беше повеќе од одлична замена.

Со сосем поинаков аранжман на песните, концертот звучеше како вистинско уметничко ремек-дело.

Најголемата грешка која по малку го наруши впечатокот, беше просторот, односно спортската сала „Борис Трајковски“ каде нема воопшто акустика, озвучувањето не беше доволно силно и звукот се разлеваше како ехо низ салата.

Но, сепак, вистинските „Нardcore“ вљубеници во нивната музичка поезија добија уживање вредно за „Милион долари“.

Концертот започна час и половина подоцна од најавеното, траеше исто толку и враќањето на бис не беше доволно за една повторена песна со оглед на неиспеаните, а очекувани „Wonderful life“, „Пиф паф пуф“, „Шал од жал“ и уште некоја друга стара и подзаборавена. Фановите би сакале концертот да трае до бескрај, бидејќи од Архангел никогаш доста.

Иако салата не беше целосно исполнета делумно поради високите цени на влзниците,  а делумно и поради неприсуството на останатите членови на бендот, сепак оние кои присуствуваа ќе го паметат долго.

Се пееја на цел глас „Војна“, „Крст“, „Љубов или омраза“, „Драги“, „Нож“, „Вина невина“ и кулминативната  „Uber macedonishen“.

Настан кој сигурно никого не остави рамнодушен и останува врежан како вреден музички спомен и вистински македонски концерт за паметење.

Фото: Влатко Петревски