Нови морничави тврдења за Бритни Спирс: Го напаѓа сопругот, спие со нож под кревет и не зборува со децата

Детали

вторник, 16 мај 2023

Според нов документарец на TMZ, Бритни е зависна од кофеин, спие со нож под креветот и е насилна кон сопругот Сем Ашгари. Истовремено, цела година ги нема видено синовите и најголем дел од времето минува сама дома.

Бритни Спирс повторно се најде во центарот на вниманието, по нов контроверзен документарец според кој пејачката е потполно изолирана од светот, некогаш е физички насилна кон сопругот Сем и си ги нема видено децата повеќе од една година.

Документарецот Britney Spears, The Price of Freedom (Бритни Спирс, цената на слободата) премиерно се емитуваше во понеделникот (15.05) на телевизијата Fox и се фокусира на животот на пејачката откако се ослободи од легалното старателство.

Според тврдењата на продуцентите од TMZ кои стојат зад документарецот, Бритни живее во изолација и најголем дел од времето е сама дома.

„Некогаш оди со автомобилот до некој пуст пат, се паркира и само медитира“, вели едниот од продуцентите.

Наводно, Бритни била и зависна од кофеин и речиси постојано консумирала енергетски пијалаци и кафе.

Поради ова, ѝ се случувало да остане будна и два-три дена по ред. Некогаш, пак, спиела по три дена без престан.

Во документарецот, неколку лица тврдат дека и бракот на Бритни не е во најдобра состојба. Имено, таа била насилна – дури и го удирала Сем – но тој „е пасивен и само ја трпи“.

Караниците помеѓу Бритни и Сем биле секојдневие, а во некои ситуации морало да се вмеша и обезбедувањето на пејачката за да ги смири.

Наводно, понекогаш Бритни спиела со нож под нејзиниот кревет и постоел ризик сериозно да го повреди Сем.

По премиерата на документарецот, Сем Ашгари се огласи со видео на Инстаграм Стори:

„Според мене е одвратно тоа што луѓето кои беа во животот на Бритни во периодот кога таа го немаше својот глас, сега ја раскажуваат нејзината приказна како да е нивна. Апсолутно одвратно.

Како можете да ја искористите највлијателната личност на нашата генерација, принцезата на поп-музиката, да ја ставите во затвор каде што татко ѝ ѝ кажува што да прави, што да пие, што да гледа и да ја користи како машина за правење пари?

Потоа, одеднаш, по многу години кога конечно е слободна, по сè што се случи, вие ја ставате под микроскоп и ја раскажувате нејзината приказна. Не, тоа е одвратно!“

Според документарецот, Бритни е во лош однос и со нејзините синови. Наводно, ситуацијата се влошила лани летото, кога тие престанале да одговараат на нејзините пораки.

Најголема причина за гневот на синовите биле голите фотки на Бритни кои, според нив, биле засрамувачки.

Според извори на Page Six, Бритни последен пат ги видела синовите на почетокот од 2022 година.

Во меѓувреме, Бритни Спирс пишува автобиографска книга, а изјави дека е инспирирана од бројните документарци за неа.

Во сега избришана Инстаграм објава, Бритни истакна дека ваквите документарци ја прикажуваат во лошо светло, а користат толку лаги што таа смета дека се нелегални.

Иако фановите на Бритни се загрижени за неа, по премиерата на последниот документарец и тие застанаа на нејзина страна.

Во коментари на Јутјуб, повеќето се згрозени од новиот документарец:

„Одвратно е како некои луѓе не веруваат што ѝ направи нејзиното токсично семејство“.

„Никогаш нема да ја остават Бритни на мир“.

„Овој документарец е направен по барање на таткото на Бритни. Нејзиниот татко психопат. Тој не може да се помири дека повеќе не може да ѝ ги краде парите, па продолжува да ја малтретира со вакви филмови“.

Некои, пак, сметаат дека документарецот ја прикажува реалноста, но истакнуваат дека Бритни не е виновна што сега се наоѓа во оваа ситуација:

„Лековите што ги пиеше Бритни можат да предизвикаат перманентна штета на мозокот. А, колку подолго ги пие, толку е поголема штетата. Тажно е што ѝ се случи сето ова“.

„Во ред е да не ви се допаѓа документарецот, но сепак да сфатите дека Бритни минува низ тежок период и ѝ треба помош“.

Спирова С. | Црнобело