Меган Фокс откри дека имала спонтан абортус со бебето на Машин Ган Кели: „Се прашував - Зошто ми се случи тоа?“

Детали

среда, 08 ноември 2023

„Ни беше многу тешко и на двајцата и тоа нè одведе во еден сосема поинаков правец“ – Меган Фокс отворено призна дека имала спонтан абортус со бебето на Машин Ган Кели и откри како загубата влијаела врз нивната врска. Зад бизарните појавувања од изминатите месеци се криела огромна болка.

Актерката Меган Фокс деновиве активно ја промовира нејзината нова книга поезија насловена „Pretty Boys Are Poisonous“ (Убавите момчиња се отровни), па по тој повод даде интервју каде отворено зборуваше за сѐ она што ѝ се случувало во изминатиот период, но и за настаните што ѝ дале инспирација да ги напише песните.

Во две од песните таа зборува за тагата со којашто се соочила откако имала спонтан абортус, а за првпат отворено прозборе и за емоциите што таа и нејзиниот дечко Машин Ган Кели ги доживеале по загубата.

Парот беше свршен и отворено ја искажуваа љубовта еден кон друг сѐ до февруари годинава, кога актерката ги избриша сите фотки од нејзиниот Инстаграм профил и објави само една фотографија со загадочен опис, што многумина го протолкуваа како обвинение за неверство.

Меган не откри кога точно се случил спонтаниот абортус, но признава дека загубата во голема мера влијаела врз развојот на нивната врска. Како што откри во песната, таа била во 10-тата недела од бременоста кога го загубила бебето.

„Никогаш не сум била низ такво нешто. Имам три деца, па затоа ни беше многу тешко и на двајцата и тоа нè одведе во еден сосема поинаков правец заедно, но и одвоено и се трудевме да сфатиме: ‘Што значи ова?’, ‘Зошто ни се случи ова?’“ – вели Меган во интервју за ABC News.

Освен за загубата на детето, Меган зборува и за насилните врски во кои била, а за кои вели дека јавноста никогаш не дознала.

Се знае дека Меган била во врска со Машин Ган Кели, а претходно во брак со актерот Брајан Остин Грин, но ја поврзуваа и со актерите Шиа Лабаф и Дејвид Галагер.

„Во мојот живот сум била во најмалку една врска во која сум трпела физичко насилство и неколку врски во кои бев малтретирана психички.

Јавно ме поврзувале само со неколку луѓе, но ја делев мојата енергија со неколку ужасни луѓе, кои истовремено беа многу славни. Но никој не знае дека сум била во врска со нив“ – вели таа.

За крај, Меган напоменува дека нејзината книга не е автобиографска и дека не треба да се толкува како мемоар, но насилните врски ја натерале да ги напише песните што се опфатени во неа.

Меган со Дејвид Галагер

Како што вели, целта е да им помогне на другите жени дека не мора да молчат за сѐ што преживеале, туку да најдат начин да ја искажат сопствената болка.

Меган со Шиа Лабаф

Б. С. Б. | Црнобело