„Се родив како машко, но лекарите ми го смениле полот за да ми го спасат животот – дознав 22 години подоцна“

Детали

сабота, 02 септември 2023

Софи од Англија се родила со машки полови органи, но поради ретко нарушување, лекарите сфатиле дека е најдобро да ѝ ги отстранат гениталиите и да ѝ го променат полот. Софи била одгледана како девојче и голем дел од животот пиела терапија со естроген, а вистината ја дознала дури на 22 години.

Софи Отавеј од Англија била родена со ретко нарушување, поради што итно ѝ била потребна операција.

Таа се родила во 1986-та, со нарушување поради кое органите во абдоменот не се формирале правилно. Ова, пак, резултира со развивање на органите како мочниот меур и цревата надвор од телото.

Операцијата била неопходна за да ѝ се спаси животот.

Но, Софи била родена како момче, а го дознала тоа дури многу подоцна.

Таа се родила со оштетен пенис, но здрави тестиси. Поради ова, лекарите ги советувале нејзините родители целосно да ги отстранат машките гениталии за во иднина да се избегнат компликации.

Следниот ден, родителите морале да го пополнат документот за раѓањето на Софи и, следејќи ги советите на хирургот, запишале дека е женско.

Денес, Софи има 37 години, а за The Sun открива дека дознала за целата ситуација дури на 22-годишна возраст.

Имено, лекарите им кажале дека е најдобро таа да не знае.

Софи дознала дека била родена како машко сосема случајно, кога била на преглед. Резултатите од прегледот покажале дека има XY хромозоми (жените имаат XX хромозоми).

13 години откако дознала, Софи се соочила со друг проблем – поради лошо изведената операција, таа развила сепса.

„На 11-годишна возраст, како што ми наближуваше пубертетот, почнаа да ми даваат терапија со естроген бидејќи немам јајници, а немам ни тестиси за да лачат тестостерон“, открива таа.

На Софи ѝ кажале дека мора да ја прима терапијата бидејќи кога била бебе ѝ ги извадиле јајниците поради компликација.

Кога ја дознала вистината, одлучила да престане да ги пие.

„Бев сигурна дека многу проблеми во мојот живот ми беа предизвикани од хормоните. Бев многу потешка, а не се хранев лошо. Постојано имав болки во мочниот меур. Постојано бев уморна, но и гневна“.

Откако престанала со хормоните, Софи вели дека симптомите ѝ се повлекле.

Проблемите со сепсата се јавиле за време на карантинот поради пандемијата.

Со операцијата кога се родила, на Софи ѝ била направена „пластична вагина“ – слична процедура која ја прават лицата кои си го менуваат полот.

Но, операцијата не била изведена правилно, па Софи се соочила со сепса.

Софи вели дека е свесна дека лекарите ѝ го спасиле животот, но била гневна што ѝ создале други компликации.

Денес Софи е во добра состојба, а вели дека не сака да се етикетира како машко или женско.

„Луѓето често мислат дека сум трансродово лице, но навистина не сакам етикети. Јас сум само Софи“.

На почетокот, Софи била гневна на родителите што ја криеле вистината од неа, но сега вели дека им простила и сфатила дека ѝ мислеле најдобро.

Сепак, додава дека ја споделува својата приказна за да не му се случи истото на друго бебе кое ќе се роди со состојба како нејзината. Таа смета дека требало да знае за ова и самата да одлучи за својот пол.

Спирова С. | Црнобело