2 пати ќе загинел со неговиот авион, почина од рак на панкреасот – Факти за Патрик Свејзи

10 години се борел со алкохолизмот, пушел по 60 цигари дневно и двапати за малку ќе загинел додека го летал неговиот авион. Но и покрај „лошата“ страна, Патрик Свејзи до денес е еден од омилените и најталентираните холивудски актери, а целиот живот ѝ го посветил на само една жена - сопругата со којашто беше заедно до крајот на животот.

Патрик Свејзи своевремено беше најпознатиот холивудски актер, а можеби најпрепознатлива е неговата улога во култниот мјузикл Dirty Dancing.

Овој филм му донесе и Златен глобус, а покрај романтичните филмови и комедиите како Ghost, тој се појави и во неколку акциони филмови како Road House и Point Break.

Во доцните 1990-ти, актерот доби и ѕвезда на познатиот Булевар на славните во Холивуд.

Тој беше познат и како пејач, танчар, текстописец и кореограф.

Но, неговиот живот згасна прерано – на само 57 години, актерот почина од рак на панкреасот.

Во продолжение, неколку факти за животот и импресивната кариера на Патрик Свејзи.

Патрик Свејзи е роден во 1952 година во Хјустон, Тексас.

Мајка му била танчарка и инструкторка по танц, па од неа ги наследил и талентот и желбата за танцување.

Во младоста учел класичен балет и лизгање на мраз, а истовремено се појавувал и во училишни драми.

Во средно играл и фудбал и сакал да стане фудбалер, но по повреда на коленото морал да се откаже од овој сон.

Редовно учел и боречки вештини, како аикидо, за што подоцна изјави дека ги користел за да се справи со неговиот гнев.

Откако се преселил во Њујорк, посетувал две професионални училишта за танц, а неговата кариера тргнала во нагорна линија кога ја добил главната улога во бродвејскиот мјузикл Greace.

По неколку мали филмски улоги, тој станал дел од екипата на Dirty Dancing. Интересно е што мјузиклот бил нискобуџетен филм и никој не ни очекувал да стане светска сензација.

На големо изненадување на сите, по премиерата во 1987-ма, песните од филмот почнале да ги освојуваат топ листите во САД, но и низ светот, а со тоа се прославил и самиот мјузикл.

По ова, кариерата на актерот се движеше само во нагорна линија.

Свејзи беше миленик на женската публика, но 34 години, односно до неговата смрт, „имаше очи“ само за една жена – неговата сопруга Лиса Ниеми.

Парот се запознал во 1970-та, кога актерот имал 18, а Лиса – 14 години.

Таа била ученичка во школата за танц на мајка му.

Се венчале во 1975 година, но никогаш немаа деца. Имено, иако сакале, Лиса доживеала спонтан абортус и најверојатно се откажале.

По смртта на татко му, актерот почнал 10-годишна битка со алкохолизам, за што честопати зборуваше и јавно.

Во 1990-тите отиде и на рехабилитација, а овој период се повлече од јавноста и се фокусира на одгледувањето коњи.

Свејзи беше и лиценциран пилот, а имал и две несреќи кои за малку ќе го чинеле живот.

Во 2000 година, додека летал од Калифорнија до Ново Мексико, во авионот се јавиле проблеми со притисокот.

Актерот принудно слетал во мала населена област во Аризона, а десното крило од авионот му се заглавило на улично светло. За среќа, поминал без повреди, а подоцна се појавија шпекулации дека му се вратил на порокот и дека бил под дејство на алкохол.

Сепак, подоцна се дозна дека актерот имал слабо труење од јаглероден моноксид кој претекол во неговата кабина.

Во 2006 година, актерот доживеа уште една несреќа, овој пат со сопругата која исто така е лиценциран пилот.

Тие имале проблем со напојувањето на авионот, а сопругата Лиса успеала да го слета безбедно.

По вториот инцидент, тие решија да го продадат нивниот приватен авион.

Следната година, кратко по снимањето на епизода за нова серија во којашто требало да глуми, актерот почувствувал силна болка во стомакот.

Три недели подоцна, односно на почетокот на 2008-ма, Свејзи добил дијагноза за рак на панкреасот, и тоа во четврти стадиум.

Актерот почна со хемотерапија и третман со експериментален лек кој наводно требало да го спречи дотокот на крв до туморот.

До март, тој илезе со изјава дека состојбата му се подобрува, а притоа продолжи со актерската кариера.

Два-три месеца подоцна, американските медиуми споделија дека на Свејзи му била направена итна операција за отстранување на дел од желудникот бидејќи ракот се проширил.

Овој период, тој го напишал и својот тестамент и ѝ го префрлил целото богатство на сопругата.

Сепак, актерот тврдеше дека се подобрува.

На самиот почеток на 2009 година, Свејзи бил хоспитализиран поради пневмонија која наводно била компликација од неговата хемотерапија.

Неколку дена подоцна бил пуштен дома, но набрзо потоа јавноста доста дека ракот се проширил на црниот дроб.

Тој период, актерот изјави дека за влошеното здравје сигурно се виновни и цигарите бидејќи самиот откри дека пушел и по 60 цигари дневно, и тоа во период од четири децении.

Всушност, тој воопшто не ги оставил цигарите кога почнал со третманот за рак.

На 14-ти септември 2009 година, околу 20 месеци по првичната дијагноза, актерот почина во неговиот дом.

Спирова С. | Црнобело