Доволно се улежавтe - 5 јога вежби што е добро да ги правите секој ден

Ако редовно вежбате, веројатно се истегнувате пред и после секој тренинг. Но, истегнувањето е активност што е добро да ја практикувате секој ден, без разлика дали ќе вежбате нешто друго.

Јогата, пак, е можеби најдобриот начин да го истегнете секој дел од вашето тело. А, таа не само што ќе ве направи посилни и поздрави, туку ќе ви го подобри и расположението.

За среќа, нема потреба да трошите многу време на истегнување - сосема доволно е секој ден да ги правите овие пет вежби:

Вежба број 1

Застанете „на сите четири“, со дланките поставени во ширина на рамената. Колената треба да ги поставите под колковите.

Застанете на прстите од стапалата, бавно подигнете ги колковите и застанете во положба како на фотографијата.

Притискајте ги петите кон подот, но нема потреба да го допирате ако не сте доволно флексибилни.

Погледот насочете го кон нозете. Вдишете и издишете петпати и вратете се во почетната положба.

Вежба број 2

Застанете на колена со рацете на подот пред вас.

Вдишете и исправете ја главата, спуштајќи го стомакот кон подот, како на фотографијата. Оваа положба е наречена крава.

Издишете и свиткајте го грбот нагоре, собирајќи го стомакот. Навалете ја главата напред, придвижувајќи ја брадата кон градите. Оваа положба е наречена мачка.

Наизменично менувајте ги положбите неколкупати, обрнувајќи внимание на дишењето.

Вежба број 3

Седнете исправено на земјата и испружете ги нозете напред.

Вдишете и кренете ги рацете нагоре. Издишете и почнете да се навалувате кон напред и допрете ги стапалата. Ако не сте доволно флексибилни, слободно свиткајте ги колената и грбот додека ги допирате стапалата.

Бавно вдишувајте и издишувајте петпати и вратете е во почетната положба.

Вежба број 4

Легнете на земја на грб, со свиткани колена и со стапалата поставени на подот. Колената треба да бидат раширени колку колковите, а рацете држете ги покрај телото.

Полека почнете да ги кревате колковите нагоре. Доколку можете, под вас спојте ги дланките, како на фотографијата.

Бавно вдишувајте и издишувајте петпати и вратете се во почетната положба.

Вежба број 5

Седнете исправено на земја и испружете ги нозете напред. Свиткајте го левото колено и поставете го левото стапало од надворешната страна на десното колено (како на фотографијата).

Поставете ја левата рака зад вас, а десниот лакт поставете го на левото колено.

Со издишување свртете се кон лево, помагајќи си со двете раце.

Вдишувајте и издишувајте петпати, а потоа повторете на другата страна.

Спирова С. | Црнобело