Сара Џесика Паркер со „распар“ чевли, Ел Фанинг во апостолки на црвен тепих - Новиот моден тренд со несоодветни чевли ги освои и славните
Идејата е да облечете чевли што воопшто не би ги носеле со аутфитот што сте го избрале. Чизми со елегантен фустан, апостолки и елегантни панталони или, пак, во случајот на Сара Џесика Паркер – чевли во различна боја. На овој начин ќе успеете да оставите поголем впечаток и да бидете забележани. Што мислите за овој нов тренд?
Носењето несоодветни чевли е најновиот моден тренд, на којшто не можеше да му одолее ниту актерката која важи за модна икона, Сара Џесика Паркер.
Трендот стана вистински хит кон крајот на летото и на почетокот на есента, благодарение на стилистката Алисон Борнстајн која тврди дека понекогаш и погрешните чевли може да изгледаат совршено и да го направат целокупниот изглед повпечатлив.
„Додека работев со клиенти и голем број познати личности, сфатив дека некој изглед може да биде поинтересен и поблизок до клиентот ако му се додадат аксесоари што се малку поразлични и не одговараат со целокупниот изглед“ – вели таа.
Таков пример би можело да биде носењето елегантни панталони со апостолки наместо со елегантни чевли или, пак, балетанки со макси фустан или здолниште.
Ел Фанинг во елегантни панталони и апостолки на Кански филмски фестивал
Со други зборови, најновиот моден тренд подразбира да изберете чевли што никогаш не би ги носеле со одредени парчиња облека и на тој начин да оставите впечаток.
Можете да го искомбинирате фустанот со патики или со впечатливи чизми и на тој начин да внесете нешто сосема неочекувано заради што целокупниот изглед ќе биде мошне забавен и несекојдневен.
Кејти Холмс во макси фустан и балетанки
Овој тренд брзо се прошири на социјалните мрежи, а нему не му одолеа ниту актерката Сара Џесика Паркер, која заради улогата на Кери Бредшо во филмот Sex and the City, важи за вистинска модна икона.
На една гала вечер во Њујорк, Сара се појави во елегантен фустан и со панделка на главата, но она што даде посебен печат на целокупниот изглед беа нејзините чевли. За таа пригода, Сара избра две исти чевли, но во различна боја: едната црна, а едната розова.
Инаку, ова не беше првпат Сара да се појави во различни чевли.
Таа во февруари годинава беше фотографирана во бел аутфит со чевли во различна боја, а истото го направи и во 2019-та година на модна гала во Њујорк, кога носеше една розов и еден златен чевел.
Б. С. Б. | Црнобело
Би можело да ве интересира:
Препорачуваме
Најчитани неделава
