Надлежните престанаа да го пребаруваат теренот, истрагата оди во нов правец – Нови детали за потрагата по Данка Илиќ

Детали

четврток, 28 март 2024

Србија трет ден трага по исчезнатото 2-годишно девојче Данка Илиќ, а според информациите во српските медиуми, потрагата на местото на исчезнувањето е прекината, сега се следат нови траги и докази – се проверуваат базните станици, а најдена е и видеоснимка од надзорни камери во близина.

Малата Данка Илиќ (2) од Бор, Србија, исчезна во вторникот (26.03) во 13.45 часот во приградската населба Бањско Поље, а според изјавата на мајката, девојчето одеднаш го снемало од местото каде што биле на излет.

Во првите 24 часа од истрагата надлежните лица го пребаруваа детално теренот во размер од околу 10 километри квадратни, но сега според објавите во српските медиуми, истрагата на теренот е прекината, а полицијата се пренасочила кон другите траги во истрагата.

Полицијата во рамки на истрагата го земала телефонот на мајката Ивана Илиќ на вештачење, а родителите биле однесени во полиција на сослушување, но тоа не значи дека се осомничени, туку само им се земаат изјави.

Освен тоа, се прави проверка и на базните станици од мобилната телефонија во областа за да се утврди движењето на сите личности кои во кобниот период околу исчезнувањето на малата Данка биле во нејзина непосредна близина.

Вкрстувањето на овие докази со изјавите од родителите и другите сведоци би можело да укаже на извесни недоследности во изјавите што биле дадени во полиција.

Детективот Миле Новаковиќ, кој е поранешен началник на Управата на криминалистичката полиција, даде изјава за српски Blic, во која нагласува дека сослушувањето на родителите на девојчето не значи дека тие се виновни за нешто.

„Кога теренската претрага не дава резултат, тогаш мора да се оди на нешто друго и да се прошири истрагата. Се истражува најблиското окружување.

Обично на почеток се оди на прво полиграфско испитување.

Причината не мора да биде сомнеж во родителите или во некој од членовите на семејството дека нешто му направиле на детето, туку едноставно тоа се прави затоа што детето не е најдено во теренската потрага“ – вели тој.

Исто така, полицијата ги добила снимките од надзорните камери од домот на една од сосетките која ја снимила улицата каде што се наоѓало девојчето непосредно пред исчезнувањето.

Особено внимание привлече тоа што е забележен автомобил со таблички од Крагуевац кој се појавил на улицата само неколку минути откако мајката поминала оттаму.

Дел од српските медиуми пишуваат дека полицијата го пронашла мажот кој управувал со автомобилот, но се покажало дека станува збор за сосед кој возел под дејство на алкохол и затоа поминал со голема брзина.

Мајката во изјава за медиумите рече дека била на излет со двете деца во Бањско поље каде што живеат нејзините родители. Во еден миг само се свртела и девојчето го снемало.

За потсетување, за малата Данка во Србија за првпат беше вклучен системот „Пронајди ме“, кој е српска верзија на американскиот систем познат како „Амбер алерт“, со којшто јавноста брзо се известува за исчезнувањето на некое дете.

Прочитајте и Што претставува системот за исчезнати лица „Амбер алерт“ + грозоморната приказна заради која е создаден

Б. С. Б. | Црнобело / фото: Фејсбук