Три морничави трилери чиј крај ќе сакате што побрзо да го дознаете

Ако сте љубител на трилери и приказни со неизвесен крај, овој пат ви препорачуваме три книги за страшни женски судбини, кои едвај ќе чекате да ги дочитате до крај.

Средовечна жена која некогаш била сон на секој маж, а сега никој не ја забележува, размислува да направи злочин; жена соочена со страшната судбина се навраќа на минатото и на нејзината замислена другарка; жена која мора да ги прифати грешките од минатото на својата ќерка и да биде казнета за тоа...

Прочитајте ги овие три трилери од кои ќе ви се замрзне крвта, и ќе сакате што побрзо да го дознаете крајот на приказната:

„Невидлива“ – Сузи Лајнес

Рејчел е средовечна жена во менопауза, која во младоста била сон на секој маж, но денес како да е невидлива.

Иако може да избира, таа решава да се омажи за Марк, скромен и пристоен маж, кој повеќе го цени нејзиниот карактер отколку убавината.

Рејчел го замислува бракот како семејна идила и им се посветува целосно на децата и сопругот, но, како поминува времето, таа сфаќа дека почнала да се запоставува и дека по 27 години брак, станува „невидлива“ за нејзиниот сопруг.

За себе смета дека се претворила во домашна помошничка, на која никој од семејството, но и во општеството, веќе не ѝ обрнува внимание.

Нејзиниот револт толку расте, што таа почнува да размислува – кога веќе е невидлива, да направи нешто за што никој не би можел ни да претпостави дека е способна.

„Шепни ми нешто“ – Кери Ен Кинг

Мејси е самохрана мајка која никогаш не ги исполнила очекувањата на најблиските.

Таткото на нејзината ќерка смета дека е психички нестабилна, но и покрај тоа ја прогонува – каде и да оди Мејси, тој е секогаш таму и ѝ ги потенцира нејзините недостатоци.

Но, по еден телефонски повик, животот ѝ се менува во целост.

Нејзината мајка е во кома и Мејси треба да реши дали таа ќе продолжи да живее или да ја остави, да ги напушти неа и нејзиниот татко.

И додека Мејси бара одговори, таа почнува да се навраќа на детството и на девојчето со кое си играла кога била мала, а кое сега е возрасна жена.

Откако знае за себе, Мејси е поврзана со неа. Но, истражувајќи ги најмрачните спомени, почнува да се прашува дали Марли, ликот кој ѝ е животна водилка, е реална личност или замислена другарка и плод на нејзината фантазија…

„Ќерката“ – Луси Досон

Џес живее со грешките од минатото кои пред 17 години ги направила нејзината ќерка.

Кога ќе се сети на тоа, ѝ замрзнува крвта, но пробува да се помири со улогата што ја одиграла и самата таа во целата ситуација.

Цената на нејзината грешка е голема и засекогаш ја менува Џес, а таа веќе не е личноста што некогаш била.

За да избега од минатото, Џес се сели и почнува нов живот со своето семејство.

Но, кога во нивниот дом почнуваат да се случуваат застрашувачки работи, поврзани со она што ѝ се случило на нејзината ќерка, Џес знае дека нема да побегне од минато.

А. Ј. | Црнобело