Актерите од „Friends“ конечно се огласија за смртта на Метју Пери + проговори и неговата бивша свршеница

Детали

вторник, 31 октомври 2023

„Скршени сме од загубата на Метју. Имаме да кажеме многу, но сега ќе одвоиме време да жалиме и да се справиме со оваа голема загуба“, велат главните актери од серијата Friends за трагичната смрт на Метју Пери. На Инстаграм се огласи и поранешната свршеница на актерот, која вели дека иако ја повредил, сепак ѝ останал драг по разделбата. Во меѓувреме, фановите положуваат цвеќе пред зградата од серијата во Њујорк.

Три дена по трагичната смрт на Метју Пери, се огласија неговите колеги од серијата Friends.

Со заедничка изјава за магазинот People, Џенифер Анистон, Дејвид Швимер, Мет Лебланк, Кортни Кокс и Лиса Кудроу велат дека се со скршени срца.

„Скршени сме од загубата на Метју. Ние бевме повеќе од колеги. Ние сме семејство. Имаме да кажеме многу, но сега ќе одвоиме време да жалиме и да се справиме со оваа голема загуба.

Кога ќе дојде време, ќе кажеме повеќе, кога ќе бидеме способни.

Засега, нашите мисли и нашата љубов се со семејството на Мети, неговите пријатели и сите од целиот свет кои го сакаат“, гласи изјавата.

Метју Пери и главните актери од Friends соработуваа заедно цели десет години, колку што траеше снимањето на серијата.

Претходно, во неделата (29.10), се огласија и креаторите на Friends – Марта Кауфман и Дејвид Крејн, заедно со главниот продуцент Кевин Брајт:

„Шокирани сме и многу, многу тажни за смртта на нашиот сакан пријател Метју. Уште ни изгледа невозможно. Сè што можеме да кажеме е дека се чувствуваме благословено што беше дел од нашите животи.

Тој беше неверојатен талент. Клише е да се рече дека некој актер ја присвоил својата улога, но во случајот на Метју, нема повистинити зборови.

Од денот кога го видовме во улогата на Чендлер Бинг, за нас не постоеше друг избор. Секогаш ќе ги цениме радоста, светлината и интелигенцијата што ја вметнуваше во секој момент – не само на работа, туку и во неговиот живот.

Тој секогаш беше најсмешната личност во просторијата. Покрај тоа, беше најдобар, со дарежливо и несебично срце. Ја испраќаме целата наша љубов до неговите семејство и пријатели.

Ова дефинитивно е епизодата каде нашите срца се скршени“.

Во меѓувреме, се огласи и поранешната свршеница на актерот – Моли Хурвиц – со која актерот беше свршен од ноември 2020-та до јуни 2021-ва.

Моли сподели фотка на која се гледа силуетата на актерот и прозборе и за болката што ѝ ја предизвикал, но истакна дека ѝ останал драг и по разделбата.

„Би му се допаѓало што светот зборува за тоа колку беше талентиран. И, навистина беше многу талентиран. Како што наближуваше обединувањето на екипата од Friends, заедно ја изгледаме серијата...

Ги прегледуваше и ги проучуваше сцените. Нашата почит за хуморот е нешто што нè поврзуваше. Беше магично тоа што бев со него додека тој ја откриваше својата брилијантност.

Продолжува на следната страница...