Џенифер Анистон, Мет Лебланк и Кортни Кокс со емотивни објави, две недели по смртта на Метју Пери: „Летај високо, конечно си слободен“
- Детали
- среда, 15 ноември 2023
„Секогаш ќе се насмевнам кога ќе помислам на тебе и никогаш нема да те заборавам. Никогаш“ – му порача Мет Лебланк на колегата Метју Пери, 2 недели по трагичната смрт на актерот кој беше најден мртов во џакузи во неговиот дом во Лос Анџелес.
Две недели по трагичната смрт на актерот Метју Пери (54), кој ќе остане запаметен по улогата на Чендлер во серијата Friends, неговите колеги упатија емотивни пораки на социјалните мрежи.
Џенифер Анистон, Мет Лебланк и Кортни Кокс објавија повеќе фотки со Метју на Инстаграм и до нив напишаа емотивни пораки.
Мет, кој во Friends ја толкуваше улогата на најдобриот пријател на Чендлер, Џои Трибијани, не ја крие болката заради прераната загуба на пријателот.
„Со тешко срце велам збогум. Времето што го поминавме заедно, искрено е едно од најубавите времиња во мојот живот.
Беше чест со тебе да ја делам сцената и да те викам мој пријател. Секогаш ќе се насмевнам кога ќе помислам на тебе и никогаш нема да те заборавам. Никогаш.
Рашири ги крилјата и летај брате, конечно си слободен. Со љубов.
И, претпоставувам дека ќе ги задржиш 20-те долари што ми ги должиш“ – напиша Мет.
Кортни Кокс сподели една од најсмешните сцени, кога Рос во Friends ги фати во кревет, а до видеото напиша:
„Благодарна сум за секој миг што го имав со тебе Мети и ми недостасуваш секој ден.
Кога со некого работиш толку блиску како јас што работев со Метју, постојат илјадници мигови што би можел да ги споделиш. Засега, ова е еден од моите омилени мигови.
Да ви објаснам што се случува. Чендлер и Моника треба да имаат секс за една вечер во Лондон.
Но, заради реакцијата на публиката, ова беше почетокот на нивната љубовна приказна. Во оваа сцена, пред да почнеме да снимаме, тој ми шепна смешна реплика што требаше да ја кажам.
Често правеше така. Беше смешен и љубезен“ – напиша актерката.
За потсетување, Метју Пери беше најден мртов во џакузи во неговиот дом на 28-ми октомври. Иако првичните наоди за причините за смртта се готови, засега надлежните не соопштуваат информации и нагласија дека ќе бидат потребни дополнителни испитувања.
Според дел од американските таблоиди се очекува дека причината за смртта ќе биде откриена со токсиколошките наоди, а дека е голема можноста кај него да биде откриена супстанца што не е позната или не се знае дека актерот ја зел.
Џенифер Анистон сподели фотка со актерот на сетот на Friends, како и скриншот од разговор помеѓу нив.
Во разговорот, актерот ѝ ја испратил фотографијата и вели дека му се разубавил денот бидејќи ја насмеал. На ова, Анистон му одговорила: „Првпат од илјадници пати“.
Актерката сподели и емотивна сцена од хит-серијата помеѓу Рејчел и Чендлер.
„Збогувањето со Мети беше луд бран од емоции кој не сум го почувствувала претходно. Сите се соочуваме со загуба во одреден период од нашите животи. Загуба на живот или загуба на љубов.
Да можете вистински да ја издржите оваа тага ви овозможува да ги почувствувате моментите на радост и благодарност за тоа што сте сакале некој толку многу. И, го сакавме многу.
Тој беше дел од нашата ДНК. Секогаш бевме ние шестмина. Ова беше избрано семејство кое засекогаш промени кои сме и какви ќе бидат нашите патишта.
За Мети, тој ЗНАЕШЕ дека сака да ги насмее луѓето. Како што кажа и самиот, ако не ја слушнеше смеата, мислеше дека ќе умре. Неговиот живот буквално зависеше од тоа. И, навистина успеа. Нè насмеа сите.
Изминативе неколку недели ги разгледував пораките што си ги пишувавме. Се смеев и плачев, па повторно се смеев. Ќе ги чувам засекогаш. Најдов порака што ми ја прати изненадно. И таа кажува сè.
Мети, те сакам многу и знам дека сега си го најде мирот и не чувствуваш болка. Зборувам со тебе секој ден…
Почивај во мир братче мало. Секогаш ми го разубавуваше денот“, стои во описот на објавата.
Прочитајте и „Епизодата кога сите загубивме пријател“: Најзабавните моменти од „Friends“ со засекогаш омилениот Чендлер
Б. С. Б. | Црнобело
Би можело да ве интересира:
Препорачуваме
Најчитани неделава
