Зошто понекогаш окото ни „игра“ и дали е знак за сериозен проблем?

Играњето на окото е појава со која сме се соочиле скоро сите. Во повеќето случаи, причината се фактори како замор, стрес и пиење многу кафе. Но, ако имате и други симптоми, секогаш е добро да одите на лекар.

Таканареченото играње на окото може да биде причинето од многу работи. Ако трае краток период, не треба да ве загрижува, но доколку ви создава проблем подолго време, препорачливо е да одите на лекар.

Што е играње на окото?

Играњето на окото е неволно движење на очниот капак.

Капакот може да ви се затвора или може да чувствувате како ви пулсира, без да се затвора.

Очните капаци се контролирани од мускули – еден кој ги отвора и еден кој ги затвора.

Во повеќето случаи, овие мускули го предизвикуваат „играњето“ на окото, но некогаш може да биде и од другите очни мускули.

Зошто се јавува?

Најчестата причина за играње на окото медицински е почната како миокимија на очниот капак.

Во овој случај, играњето на окото не е предизвикано од здравствен проблем.

Најчеста причина за миокимија на очниот капак е:

• Пиење алкохол
• Силно светло
• Пиење големо количество кафе
• Напрегање на очите
• Замор
• Иритација на окото
• Никотин
• Стрес или анксиозност
• Загадување на воздухот или ветар

Постојат и некои медицински состојби кои можат да предизвикаат играње на окото, како сувост на очите и чувствителност на светлина.

Во некои случаи, играњето на окото може да биде несакан ефект од некои лекови, најчесто од оние за Паркинсонова болест.

Многу ретко, играњето на окото може да биде знак за болести и нарушувања на мозокот и нервниот систем. Но, во овој случај, играњето на окото ќе биде придружено и со други симптоми.

Кога да одите на лекар?

Играњето на окото не треба да ве загрижува ако трае неколку дена, па и недела-две.

Сепак, одете на лекар доколку:

• Играњето на окото не престане по две недели
• Окото целосно ви се затвора
• Тешко ви е да го отворите окото
• Чувствувате грчење на мускулите и на други делови од телото
• Окото ви е црвено, отечено или има исцедок
• Горните капаци ви се многу спуштени

Како да го намалите играњето на окото кога не станува збор за здравствен проблем?

За да се ослободите од оваа непријатна појава, ќе мора да направите промени во секојдневието.

Квалитетниот сон, намалувањето на стресот и намалената консумација на кафе и алкохол можат да ви бидат од помош.

Ако имате суви очи, можете да користите и капки, но во овој случај најдобро е да се консултирате со лекар.

Доколку страдате од анксиозност, разговарајте со професионалец кој ќе ви помогне да се справите со неа.

Спирова С. | Црнобело