Извор на калиум и магнезиум: 6 рецепти за одличен оброк со сливи

Без оглед дали сте љубител на слаткото или на солените специјалитети, сливата е состојка која ќе го збогати секој оброк.

Сливите се богати со калиум, калциум, магнезиум, а содржат и солидна количина од витаминот ц, како и низок процент на масти.

Постојат многу причини зошто да консумирате специјалитети со сливи, па испробајте некој од овие 6 уште денес:

1. Желе бонбони од сливи

Состојки:

• 1,5kg сливи
• 2 чаши шеќер
• Сок од еден лимон
• 8 листови желатин
• Шеќер во прав

Подготовка:

Обложете го плехот со хартија за готвење и оставете го на страна. Измијте ги сливите и исечете ги на пола, па потоа извадете ги семките. Ставете ги листовите од желатин во ладна вода да омекнат, потоа зовријте ги сливите со шеќерот и лимонот и мешајте 20тина минути додека смесата не се згусне. Во блендер промешајте ја смесата, а потоа гответе уште 10 минути. Желатинот додајте го во сливите, па излијте ја смесата во плехот и оставете ја во фрижидер на неколку часа. Кога ќе се стегне исечкајте на коцки, додајте го шеќерот во прав и послужете.

2. Торта од слива

За вкусна торта од слива потребно ви е:

• 150g путер
• 200g шеќер
• 8 сливи
• 3 јајца
• 100g брашно
• 40g палента

Рерната загрјте ја на 180 степени. Ставете го путерот во огноотпорна тава и стопете го, а потоа додајте го шеќерот и една лажица вода, па гответе уште 5 минути. Откога ќе зоврие, гответе уште 5 минути.

Додајте ги сливите и истресете ги за да се измешаат со смесата, па тргнете ги од топлината. Во голем сад изгмечете го остатокот од путерот и шеќерот, па додајте ги жолчките една по една. Потоа додајте го брашното и палентата, а белките смутете ги и додајте ја смесата што сте ја добиле од брашното и прелијте го сето врз сливите. Печете 40 минути.

Кога тортата е готова, свртете ја наопаку врз чинијата, исечете ја и послужете.

3. Ролни од суви сливи и сланина

Состојки:

• 24 суви сливи без семки
• 24 печени бадеми
• 24 парчиња сланина

Подготовка:

Загрејте ја рерната на 240 степени. Печете ги бадемите на сува тава додека не пуштат арома и не добијат боја, а потоа малку оладете ги, па ставете еден во секоја слива. Замотајте ги полнетите сливи во сланина, па зацврстете со чепкалки за заби. Печете ги 10тина минути и во текот на печењето еднаш превртете ги.

4. Џем од сливи

За да направите совршен џем од сливи потребно ви е:

• 5kg сливи без семки
• 1kg шеќер
• 2 кафени лажички цимет
• 2 кесички ванилин шеќер

Измијте ги сливите и извадете ги семките. Помешајте ги со половина од шеќерот и гответе ги додека не омекнат. Во текот на готвењето мешајте, а по 4 часа додајте го остатокот од шеќерот и гответе додека не испари вишокот на течност

Пред крајот на готвењето додајте ги циметот и ванилинот шеќер. Оладете го џемот и префрлете го во однапред подготвени стаклени тегли.

5. Колач со сливи и бадеми

Состојки за кора:

• 375g брашно
• 15g шеќер
• 225g Путер
• 1 јајце
• 4 лажички ладна вода

Состојки за фил:

• 200g путер
• 200g шеќер во прав
• 2 јајца
• 200g згмечени бадеми
• 6 големи сливи без семки

Подгответе го тестото: Помешајте го путерот и брашното, а потоа смешајте го јајцето со водата и истурете го врз измешаниот путер и брашно. Замесете добро и замотајте во фолија, па оставете го половина час во ладилникот.

За филот изгмечете го путерот и шеќерот, па додајте ги јајцата. Потоа додајте ги бадемите и соединете ја целата смеса. Загрејте ја рерната на 180 степени и изладеното тесто ставете го в калап за колач. Прелијте го направениот фил и додајте ги исечканите сливи. Печете 30-40 минути.

6. Свинско полнето со сливи со тестенини во сос од вино

Состојки:

• 95g суви сливи
• 250ml вино
• 2 кафени лажички маслиново масло
• 1 кромид
• 2 парчиња сланина
• 1 лажичка жалфија
• 30g сечкани ореви
• 160g лебни трошки
• 1 јајце
• 2kg свинско месо
• 1 лажица сол
• 1,5 лажица брашно
• 375ml говедска бистра супа
• 400g широки тестенини

Подготовка: Измешајте ги сливите и виното во сад, па поклопете ги и оставете ги да достојат неколку часа или цела ноќ. Исцедете ги и сочувајте 125ml од течноста. Загрејте половина масло во тава и испржете го кромидот и сланината. Мешајте околу 5 минути, па додајте ги сливите, жалфијата, оревите и лебните трошки. Префрлете ги во сад и зачинете со сол и бибер по желба, а на крајот додајте ги јајцата.

Загрејте ја рерната на 240 степени, а потоа наполнете го свинското и замотајте го со конец. Премачкајте со остатокот од маслото и посолете. Печете 30 минути, па смалете ја температурата на 180 степени и печете уште 1 час и 40 минути. Извадете го свинското од рерна и прекријте го со алуминиумска фолија, па оставете го 10тина минути.

Во меѓувреме, исцедете ја течноста од плехот во кој сте го печеле јадењето, а сочувајте една лажичка од течноста. Ставете ја во тава и додајте го брашното и гответе 1 минута, па полека дотурајте од виното и говедската супа. Мешајте неколку минути додека не згусне, згответе ги тестенините и послужете со месото и сосот.