ТикТок може да придонесе за ментална здравствена криза кај децата и возрасните - се согласувате ли?

Како луѓе, ние лесно стануваме зависни од одредени работи, без разлика дали тоа е храна, шопинг, алкохол или социјални мрежи. Стануваме робови на сите тие работи, кои ни влијаат негативно, а воедно и нè спречуваат да можеме да ги разгледуваме поубавите страни на животот. И пред МајСпејс имаше нешто друго, а потоа продолжи со Фејсбук, Твитер, Инстаграм, за сега да не можеме да се оттргнеме од ТикТок. Станавте ли и вие зависници од оваа социјална мрежа?

Истражувањата покажуваат дека колку повеќе време некој поминува на социјалните мрежи, толку е поголема веројатноста дека ќе развие симптоми на нарушено ментално здравје.

Високите нивоа на користење на социјалните медиуми биле поврзани со зголемени ментални нарушување oсобено кај најмладите. Социјалните мрежи се меч со две острици. 

Постои силна врска помеѓу социјалните медиуми и зголемениот ризик за депресија, анксиозност, осаменост, самоповредување, па дури и мисли за самоубиство.

Социјалните медиуми може да промовираат негативни искуства како што се:

- Незадоволство за вашиот живот или изглед.

- Страв од пропуштање и зависност од социјалните мрежи.

- Изолација.

- Депресија и анксиозност.

- Сајбер-малтретирање.

- Лажна и неконзистентна утеха.

- Нестабилно место за наоѓање безбедност.

- И многу други.

Добропознато е дека ТикТок е една од најбрзо растечките видео платформи за социјални медиуми која денес доминира со младите луѓе и привлекува повеќе од една милијарда корисници ширум светот, од кои речиси половина се на возраст од 10 до 29 години.

Оваа апликација неодамна го симна Инстаграм од тронот како најкористена апликација за социјални медиуми кај децата од 12 до 17 години, при што 63% од нив ја користат апликацијата неделно.

Податоците од Светската здравствена организација покажуваат дека во 2021 година, еден од седум адолесценти на возраст од 10 до 19 години се борел со предизвици за менталното здравје. Таа група е клучен дел од публиката на ТикТок.

Пред извесен период, нашата инфлуенсерка Миа Костова објави видео во кое зборува со Ивана Хаџиванова, психолог, Гешталт психотерапевт, семеен-системски советник и основач на „Неокортекс“ центарот. Во видеото, покрај сите останати теми поврзани со тинејџерството, се дискутира и штетноста на социјалните мрежи, посебно ТикТок.

Погледнете го видеото:

Покрај тоа што ТикТок негативно влијае на менталното здравје на сите корисници, воедно шири и голем број на дезинформации.

Впрочем, секој кој има профил може да креира какво и да било видео со каква и да било содржина, и да шири лаги, конспиративни теории, и дезинформации. Оваа апликација е минско поле од дезинформации.

Дали ТикТок на некој начин претставува машина за перење на мозокот? Ние толку многу дозволуваме да нè вшмука, што потоа нè изморува, и немаме капацитет за ништо надвор од неа, надвор во вистинскиот свет.

ТикТок може да се искористи за добро, како што се користи и за лошо. Ножот може и да убие, и да обезбеди храна и преживување. Не мора сè да е меч со две острици.

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

К. А. | Црнобело