Посни рецепти за побогата празнична трпеза

Посната трпеза за Бадник честопати се сведува на 3 работи - лепче, риба и грав. За малку да ја збогатите трпезата не мора да јадете мрсно, туку ви требаат вистинските комбинации од посни состојки.

Овие рецепти ќе ви помогнат да послужите нешто вкусно, а посно годинава и да ги израдувате најблиските:

Италијанска салата со туна

Состојки:

• Конзерва туна на парчиња
• 250ml посен мајонез
• Кесичка сенф
• 0,5kg компир
• 100g црни маслинки
• 50g мелени ореви
• Сол, бибер, зачини по желба

Подготовка:

Сварете ги компирите во солена вода. Излупете, исечкајте на парчиња и измешајте ги со сите останати состојки. Одвојте ги семките од маслинките и наредете ги како декорација.

Салата од ротквици

Состојки:

• 3 врзувалки ротквици
• 300ml посен мајонез
• Лажица сусам
• Малку лук
• Сол

Подготовка:

Измијте ги ротквиците и со исклучок на неколку, исечкајте ги на мали парчиња. Сусамот благо пропржете го и додајте го во нив. Лукот истолчете го и додајте го. Прелијте со мајонез и посолете по вкус. Декорирајте со преостанатите ротквици, исечени на кругови.

Солени бомбици од компир

Состојки:

• 1kg компир
• 125g маргарин
• Праз по желба
• 3 чешниња лук
• Зачин

Подготовка:

Сварениот компир излупете го и исечкајте го, па ставете го во длабок сад. Додадете го маргаринот и зачинот и матете со миксер. Кога смесата ќе се олади додадете го лукот и со раце со масло правете топчиња. Празот пропржете го и со него прелијте ги топчињата.

Шампињони со сардина

Состојки:

• 16 шампињони
• 2 конзерви сардина
• Црвена печена пиперка
• 100g растително сирење
• Лимон, сол, бибер

Подготовка:

Исчистете ги шампињоните од дршките. Сардините испасирајте ги, па додадете ја пиперката и исечканите дршки од печурките. Измешајте со сок од лимон, мелен бибер и сол. Печете 15 минути, извадете, изрендајте го сирењето, па допечете уште малку.

Риба во смеса од пиво

Состојки:

• Мало шише пиво
• 2 шолји брашно
• 1 лажица прашок за печиво
• 500g филети морска риба
• Сол и бибер
• Брашно за валкање
• Масло за пржење

Подготовка:

Во чинија ставете го пивото, 2-те шолји брашно и прашокот за печиво. Зачинете и посолете. Парчињата риби прво извалкајте ги во брашно, па во смесата од пиво. Оставете ги 10-тина минути пред да ги пржите. Пржењето треба да трае 5 до 7 минути. Послужете со парчиња лимон.

Посна брза торта од бисквити и шлаг

Состојки:

• 6 кесички посен шлаг
• 300g посни бисквити

Подготовка:

Изматете 5 кесички шлаг и додадете ги мелените бисквити. Промешајте и обликувајте ја смесата во тава. Изматете ја преостанатата кесичка шлаг и прелијте врз смесата со бисквити. Декорирајте по желба и оставете да се олади.

Коцки од костени со рум

Состојки:

• 1 kg костени
• 250g маргарин
• 200g шеќер
• 2 чашки рум

Подготовка:

Костените сварете ги, излупете ги и испасирајте ги. Шеќерот и маргаринот изматете ги додека не добиете пенеста смеса, па додадете рум. Додадете ги и костените и добро измешајте. Смесата измазнете ја во тава и прелијте со посно чоколадо по желба. Сечете коцки и послужете.

Пробајте и:

Посни салати

Домашни посни колачи

Посни сарми

Колачиња за 250 денари

М. Д. | Црнобело