Денеска е интернационален ден на Шерлок Холмс

Воедно, ова е и роденденот на авторот, кој низ илјадници страници ги оживеа авантурите и изострениот ум на детективот со шапка и луле.

Шерлок Холмс се појавува како главен лик во неверојатни 60 приказни, кои авторот ги објавил во периодот од 1887 до 1927 година. Заедно со неговиот партнер, докторот Џон Вотсон, не постои загатка, ниту мистерија за која ексцентричниот Шерлок не може да пронајде решение.

Самиот лик на Шерлок е структуиран совршено – тој и ден-денес останува загатка и интригантен лик. Преку мајсторски исткаени заплети, невообичаени траги и опасни ситуации, ги следиме случаите низ очите на Шерлок, кој понекогаш е анти-херој, со не толку изразени емпатични, колку дедуктивни особини.

Авторот Дојл дури успеал да реши неколку вистински случаи, според методите со кои се служел неговиот фиктивен лик во романите.

Конан Дојл починал во 1930 година, а неговите последни зборови биле наменети за сопругата. „Прекрасна си“, и рекол мајсторот на детективски романи и мистерии на својата најголема љубов, оставајќи ни го богатството наречено Шерлок Холмс во наследство.

Она што е Херкул Поаро за Агата Кристи, тоа е Шерлок Холмс за Артур Конан Дојл.

Во чест на денешниот ден, ви ја предлагаме можеби најдобрата екранизација на Шерлок Холмс, истоимениот мини-серијал кој досега брои 3 сезони, во продукција на британската BBC1, едноставно насловена Sherlock.

Англискиот актер Бенедикт Камбербач го оживеа славниот детектив кој престојува на улицата Бејкер и прекуноќ ги освои симпатиите на сите Шерлок-фанатици со својата брилијантност. Мартин Фримен се појавува во улогата на верниот д-р Вотсон, а оваа модерна верзија на Шерлок ги возбуди фановите и успеа да го задоволи вкусот дури и на најпребирливите.

Многумина се согласуваат дека ова е најдобрата и највозбудливата филмска верзија на Шерлок Холмс.

Мини серијалот брои 3 сезони, а премиерата на следната е закажана за 2017 година.

Додека со нетрпение ја очекуваме, погледнете ги претходните 11 и уживајте во авантурите на Шерлок Холмс. Со сигурност нема да се одлепите од екранот и ќе останете гладни за уште.

90 минутно уживање со секоја епизода. Забавата може да започне.

Сезона 1

A study in Pink
The blind banker
The great game

Сезона 2

A Scandal in Belgravia
The Hounds of Baskerville
The Reichenbach Fall

Сезона 3

Many Happy returns
The Empty Hearse
The Sign of Three
His last Vow

+ бонус епизода – The Abominable Bride