Жените шефови се злобни и уште 6 погрешни верувања што ни се наметнати од холивудските филмови

Сите сме свесни дека филмовите се фикција и не треба да ги сфаќаме премногу сериозно. Но, кога ќе се земе предвид нивното влијание, станува јасно дека од нив прифаќаме многу верувања и вредности.

Проблемот е што неретко овие верувања и вредности немаат врска со реалноста.

Во продолжение, погледнете за кои станува збор:

Жените шефови се злобни

Само помислете во колку популарни холивудски филмови, жените шефови се претставени како злобни личности.

Одличен пример за ова се ликовите на Мерил Стрип во „Devil Wears Prada“ и Сандра Булок во „The Proposal“. Секојпат кога ќе влезат во просторија, сите изгледаат преплашено, а на нивните вработени им е страв да направат и најмала, безначајна грешка.

Истовремено, најчесто ваквите ликови имаат бројни семејни проблеми, како пропаднат брак.

Убавиот изглед е клучен за успех

Дури и ако на почетокот ликот не изгледа како филмска ѕвезда, туку како секој просечен човек, пред да постигне некоја цел или пред да успее во нешто, сигурно доживува целосна трансформација на изгледот.

Или, кога станува збор за романса, ликот (најчесто жена) кој изгледа како „обичен“ човек не го забележува никој, сè додека не направи драстична трансформација. Одличен пример за ова е уште еден лик на Сандра Булок, во филмот „Miss Congeniality“. Во филмот никој не го ни погледнува нејзиниот лик, сè додека цел тим стилисти не ја трансформираат во атрактивна жена.

Жените не се грижат за изгледот кога се во врска

Неретко жените во холивудските филмови речиси и да не се грижат за изгледот додека се во врска. Ако, пак, раскинат, веднаш одат во салон за убавина и се претвораат во нова личност.

Можеби сите сакаат да направат нешто убаво за себе по трауматичното раскинување, но секоја жена сака да се грижи за својот изглед, без разлика дали е сингл или во врска.

Најголемите „женкари“ ќе се „смират“ кога ќе ја сретнат вистинската

Некои луѓе едноставно не сакаат да бидат во врска и тоа е сосема во ред. Но во холивудските филмови често има машки ликови кои се заколнале да бидат „вечни ергени“, за до крајот на филмот да се вљубат во „вистинската“ и целосно да се променат.

Нормално, луѓето се менуваат, но тешко дека маж кој со години е навикнат да биде сингл ќе почне сериозна врска со девојка што ја познава само еден месец.

Неверството го прави бракот посилен

Некои луѓе одлучуваат да му го простат неверството на партнерот, но тешко дека бракот ќе биде посилен по ваков настан.

По неверството, довербата во врската страда и ќе треба многу време и труд за да се врати.

Но во холивудските филмови важат други правила, па неретко неверството не само што е сосема нормално, туку и им ја подобрува врската на партнерите.

Мажот од соништата е богат и доминантен

Во повеќето романтични филмови, мажот по кој лудува женскиот лик мора да е богат и доминантен. Иако нема ништо лошо во тоа да ве привлекуваат вакви мажи, Холивуд создава погрешна слика дека сите жени ги привлекуваат само вакви мажи.

Мажот и жената кои се мразат завршуваат заедно

Помислете на некоја личност што не можете да ја поднесете. Дали мислите дека некогаш би се вљубиле во неа и би почнале врска? Веројатно не.

Но, во холивудските филмови ова веќе стана клише – штом маж и жена се мразат на почетокот, на крајот од филмот сигурно ќе се вљубат еден во друг.

Спирова С. | Црнобело