10 филмови со одлични (и необични) љубовни приказни што ќе ве загреат за Валентајн

The Curious Case of Benjamin Button

Уште една адаптација на Ф. Скот Фицџералд, но овојпат станува збор за истоимената кратка приказна.

Главниот лик е Бенџамин Батон – човек кој е роден како старец и наместо да старее, со текот на времето станува помлад.

Филмот го опфаќа целиот живот на Бенџамин, од неговото раѓање до неговата смрт, но и врската со неговата сакана која старее, додека тој станува помлад.

Нема да најдете понесекојдневна љубовна приказна од оваа, а фактот што главните улоги им припаѓаат на Бред Пит и Кејт Бланшет се уште една причина зошто треба да го изгледате филмот.

About Time

Романтичен филм со патување низ времето кој ќе ве држи во неизвесност до самиот крај.

Главниот лик е Тим Лејк кој дознава дека мажите од неговото семејство можат да патуваат низ времето до моменти што ги преживеале.

Татко му веднаш му кажува дека не треба да ја користи оваа способност за да се збогати или да стане славен, па Тим одлучува да патува низ времето за да си го подобри љубовниот живот.

Up

Нека не ве одвраќа фактот што Up e анимиран филм бидејќи овде ќе ја погледнете најубавата и најемотивната љубовна приказна, и тоа склопена во само неколку минути.

Главниот лик е старецот Карл – вдовец чија сопруга, Ели, починала од рак.

Карл и Ели не можеле да имаат деца, па одлучиле да собираат пари за патување од соништата. Но, Ели умира пред да успеат да го реализираат.

Многу години по нејзината смрт, Карл одлучува да ја исполни желбата на саканата и да ја види дестинацијата за којашто сонувале.

Иако Ели се појавува само на почетокот, нејзиното присуство се чувствува во текот на целиот филм преку Карл кој никогаш не престанал да ја сака.

Bram Stoker’s Dracula

Иако за многумина, жанровски, ова е хорор-филм, сепак раскажува епска љубовна приказна.

Филмот е снимен според книгата „Дракула“ од Брам Стокер.

Главниот лик е грофот Дракула кој е подготвен да направи буквално сè за да ја врати во живот неговата сакана.

Филмот е во режија на единствениот Френсис Форд Копола, а има и одлична актерска екипа која ги вклучува Гери Олдман, Винона Рајдер, Ентони Хопкинс и Киану Ривс.

The Shape of Water

Необичниот филм на Гилермо дел Торо освои Оскар за најдобар филм и стана вториот од жанрот фантазија кој успеал во тоа.

Главниот лик е Елиса Еспосито, девојка која не може да зборува и работи во тајна владина лабораторија во САД.

Овде таа здогледува мистериозно водно суштество кое е заробено за испитување.

Постепено, Елиса сфаќа дека суштеството е интелигентно и премногу наликува на човек, па со текот на времето се зближува со него.

Спирова С. | Црнобело