Што се случува со мозокот кога работи со „полна пареа“?

Мозокот е навистина сложена мрежа која не престанува да ги изненадува оние кои се занимаваат со негово проучување.

На Универзитетот во Лондон во последниве години развиле нов начин на снимање и скенирање на мозочната активност, во време кога личноста извршува комплицирани задачи.

Со ова, всушност се докажува дека еден од најпопуларните митови, дека користиме само 10% од својот мозочен капацитет, е сосема погрешен.

Благодарение на снимките, може да се заклучи дека мозочните клетки се целосно активирани кога сме посветени на наоѓање решение за некоја комплицирана задача.

При снимањето и мерењето со помош на функционалната блиска инфрацрвена спектроскопија на група испитаници, констатирано било дека решавањето на лесните проблеми барало помала мозочна активност.

Експериментот вклучувал набљудување одредени бои и форми на екран и во даден момент на периферијата на екранот се појавува коцка. Кај попростите форми, испитаниците лесно ја забележувале коцката, но кога требало да испроцесираат посложена форма, кај многу од нив периферната перцепција била практично непостоечка.

Со ова, дошле до заклучок дека кога мозокот е посветен на комплицирана и тешка задача, тој се активира максимално и се посветува на проблемот, без да ги перципира дразбите од страна.

Исто така, уште повеќе се потврдува сознанието дека извршувањето повеќе задачи наеднаш, популарно наречено мултитаск, може да има негативно влијание врз крајниот резултат.

Е. Д. | Црнобело