Од што зависи дали ќе ги памтите соништата или не?

Колку и да напредува науката, соништата остануваат една од неразјаснетите мистерии. Спроведени се многу експерименти, но нема точна дефиниција за причините зошто сонуваме и како се одвива тој процес.

Ова прашање уште повеќе го комплицира и фактот дека не сите луѓе успеваат да запомнат што сонувале во текот на ноќта. Сепак, постојат одредени корелации кои даваат приближни сознанија за тоа од што зависи дали ги памтите своите соништа или не.

Полот

Во просек, жените полесно можат да се сетат што сонувале отколку мажите. Исто така, тие се и позаинтересирани за соништата и скриените пораки. Но, во исто време постои и голема бројка мажи кои памтат што сонувале, а жени кои не можат да се сетат на ништо.

Возрастa

Колку сме повозрасни, се намалува нашата способност да се сеќаваме на детали од соништата. Најмногу ги памтиме во тинејџерските години и адолесценцијата. Но, тоа не значи дека после нагло ја губите таа способност. Многу луѓе јасно си ги памтат соништата дури и кога се возрасни.

Типот на личноста

Ни ова не е стрикно правило, но забележани се одредени поврзаности меѓу типот на личноста и сеќавањето на соништата. Практичните луѓе помалку ги памтат, додека духовно ориентираните лесно се сеќаваат.

Количината на спиење

Должината на сонот е значаен фактор кој влијае врз тоа дали ќе запамтите што сте сонувале. Луѓето сонуваат на секои 90 минути од РЕМ-фазата, а во близина на утрото, сонуваат поинтензивно. Колку пократко спиете, толку помалку сонувате и помали се шансите да се сетите на сонот. Затоа и луѓето најмногу се сеќаваат на она што го сонувале за викенди.

Мозочна активност

Колку поразвиена и побујна фантазија имате, толку повеќе сонувате и се сеќавате на она што сте го сонувале. Исто, оние кои си ги памтат соништата побрзо процесираат информации и емоции кога се будни и побрзо реагираат на стимулации. Со тоа, дури и нивниот мозок додека спијат е поактивен отколку кај оние кои послабо ги памтат своите соништа.

Е. Д. | Црнобело