Зошто посетата на книжарницата „Shakespeare and Company“, во срцето на Париз, е посебно доживување?

Многумина кои го имаат посетено Париз во еден момент се нашле пред или околу книжарницата Shakespeare and Company, стационирана во самото срце на градот. Точно покрај брегот на реката Сена и во близина на катедралата Нотр Дам, еден од главните споменици на готскиот период се наоѓа една од најинтересните книжарници што некогаш ја имате видено.  

Без разлика во кој дел од Париз се наоѓате, најдобро е да се качите во метро и да се симнете на станицата Saint-Michel. Тука веќе бидете подготвени да се соочите со голем број на туристи кои љубопитно и со нетрпение пробуваат да посетат што повеќе знаменитости во Париз.

Кога ќе излезете на улица, имате неколку стотина метри до книжарницата Shakespeare and Company, а по патот ќе поминете покрај различни сувенирници кои продаваат секакви дребулии: од разгледници, магнети, приврзоци, торби, капи, но и покрај интересни ресторанчиња и антикварници за книги.

Од едната страна се наоѓаат сите овие одвлекувачи на внимание, а од другата Нотр Дам која во моментот е подложена на реконструкции.

Ако за првпат го посетувате Париз, нема да можете да одолеете и нозете ќе ве насочат кон катедралата, но, јас, во овој случај предност ѝ дадов на книжарницата.

Оние кои ги интересира повеќе, Shakespeare and Company е основана од Американецот Џорџ Витман во 1951 година во зграда од 17 век која првично имала функција на манастир.

По отворањето оваа книжарница прераснала во место за средби на англофонските писатели и читатели, станувајќи своевидна книжевна институција во самиот Париз.  

И, ете сум! Кога се најдов пред книжарницата забележав долга редица на луѓе како чекаат да влезат внатре.

Сигурно имаше околу педесетина туристи кои беа решени да чекаат за да влезат во просториите на Shakespeare and Company и барем на кратко да се измешаат со светот на илјадници приказни и мирис на стари и штотуку отпечатени книги.

За жал, забрането е фотографирање во внатрешноста на книжарницата.

Па затоа нема да можам да обезбедам такво виртуелно задоволство, но само ќе ве мотивирам и ќе ви шепнам во прва можна прилика да дојдете и лично да го доживеете ова култно место.

Не сакав да бидам од оние кои се прават слепи пред ознаката „забрането фотографирање“ кои се испозалепени насекаде низ книжарницата.

Кога ќе се најдете внатре, помеѓу сите тие полици со книги, само тогаш можете да разберете зошто Ернест Хемингвеј, Ф. Скот Фиџцералд, Хенри Милер и уште многу други писатели наоѓале спокој и инспирации токму во овие простории.

Можете да ги посетите полиците со добро познатите класици, или со нови имиња од светската книжевна сцена, како и голем избор на епска и научна фантастика, модерна психологија, детска литература...

Изборот е толку голем што нема да излезете од книжарницата без да купите неколку книги.

На горниот кат има и просторија за читање, така што ако немате трпение, можете да ја започнете штотуку купената книга токму во Shakespeare and Company.

На крај, откако ќе заврши патешествието низ просториите на книжарницата можете да седнете во истоименото кафуле, да си нарачате кафе и да уживате во погледот што се наоѓа пред вашите очи.

©CRNOBELO.com Забрането преземање и копирање. Крадењето на авторски текстови е казниво со закон.

 Е. Х. | Црнобело